U zaasadzie ŭ Bujničach pad Mahilovam papaŭnieńnie — tudy pryvieźli paŭtarahadovuju samku dvuchhorbaha viarbluda pa mianušcy Lala. Jaje admietnaść — absalutna bieły koler voŭny. Heta davoli redkaja maść dla baktryjanaŭ, ale dla Biełarusi heta nie pieršy padobny vypadak za apošni čas.
Lalu kupili ŭ studzieni hetaha hoda ŭ adnym z zaasadaŭ Minskaha rajona. Jak raspavioŭ fotakarespandentu miascovaha telehram-kanała «MahiloŭAnłajn» zahadčyk ustanovy Ivan Nižnikaŭ, maładaja viarbludzica «vielmi kulturnaja i pakul nie plujecca».
Zaraz žyviołu pasialili ŭ adkrytym valjery razam z aviečkami i jakami. Pa słovach Nižnikava, kapytnym tak viesialej i jany patrabujuć kampanii: razam jaduć, hulajuć i navat ližuć adno adnaho. Kormiać Lalu ŭ asnoŭnym sienam, sałomaj, harodninaj i nievialikaj kolkaściu aŭsa dla rostu. Jana taksama achvotna prymaje pačastunki ad naviedvalnikaŭ, naprykład, vafielnyja šklanački z morkvaj.
Cikava, što zahadčyk asabliva padkreślivaje važnaść emacyjnaha kantaktu: viarbluda treba padzyvać i hładzić za nos, kab jon adčuvaŭ luboŭ.
Pakul Lala — adziny viarblud u mahiloŭskim zaasadzie. U budučyni joj spadziajucca znajści samca dla naščadkaŭ — albo nabuduć maładoha viarbluda, albo adviazuć Lalu ŭ hości.
Naturalny koler dvuchhorbych viarbludaŭ — karyčnieva-piasočny. Siarod svojskich baktryjanaŭ biełyja i kremavyja asobiny ličacca vialikaj redkaściu i ceniacca vyšej za inšych. Naprykład, u Zabajkalli ich dola składaje ŭsiaho kala 2,8%.
Adnak Lala, niahledziačy na heta, nie adziny bieły viarblud u Biełarusi — zusim niadaŭna, u sakaviku 2024 hoda, u ahrasiadzibie pad Maładziečnam naradziłasia jašče adno biełaje viarbludziania.
Tady videa z novanarodžanym malaniom, jakomu paśla dali mianušku Vasilok, sabrali miljony prahladaŭ u TikTok. Jaho maci, viarbludzica Šyša, spačatku nie prymała dziciania, i haspadaram daviałosia dziažuryć kala jaho kruhłasutačna, dapamahajučy ŭstać na nohi.
Jak i ŭ vypadku ź Lalaj, Vasilok nie albinos, a prosta pradstaŭnik vielmi redkaj maści. Pa ŭschodnich pavierjach, naradžeńnie biełaha viarbluda prynosić pośpiech i dabrabyt.
U Mahiloŭskim zaasadzie rychtujuć jašče adnu navinku: tam budujuć kantaktny zaapark, dzie za dadatkovuju płatu (kala 5 rubloŭ) možna budzie zajści ŭ valjery da šatłandskaj karovy, alpaki i koz, kab pakarmić ich i pahutaryć z žyviołami bližej. Budaŭnictva viaduć ułasnymi siłami studenty i vykładčyki miascovaha ahralesatechničnaha kaledža.
Ciapier čytajuć
Śvieckaje žyćcio Darji Šmanaj: dni naradžeńnia dziaciej Kirkorava i Comedy Club2
Kamientary