Razhramili kvateru eks-prakurora Babaka. Jaho samoha zatrymała milicyja pa administracyjnaj spravie
Jak paviedamili «Našaj Nivie» svajaki byłoha prakurora Jaŭhiena Babaka, siońnia ź im niespadziavana źnikła suviaź — niečakana dla čałavieka, jaki siadzić doma z karanavirusam. Brat, jaki pryjechaŭ praviedać Jaŭhiena, znajšoŭ uzłamanyja dźviery i ŭščent raźniesienuju kvateru, uskryvali navat plintusy.
«Heta žach», — kaža brat.
Sa słovaŭ susiedziaŭ, ranicaj da Babaka pryjechała hrupa zachopu ŭ broniekamizelkach, hetyja ludzi ŭ tambury kryčali «admykaj», u dvary byli dva charakternyja busiki. Paśla ŭsiaho Jaŭhiena źvieźli.
Dapaŭnieńnie: Paźniej źjaviŭsia kamientar Ministerstva ŭnutranych spraŭ: «Hramadzianin nie źnik, jon zatrymany supracoŭnikami milicyi ŭ ramkach administracyjnaha pracesu. Viadoma, što zatrymany ŭ tym liku aktyŭna raspaŭsiudžvaŭ infarmacyju z ekstremisckich telehram-kanałaŭ», — paviedamlaje viedamstva.
Jaŭhien Babak syšoŭ z pasady pamočnika prakurora Pieršamajskaha rajona paśla taho, jak u prakuratury praihnaravali jaho pradpisańnie ab praviadzieńni pravierki pa fakcie žorstkaha źbićcia bajkieraŭ ludźmi ŭ formie supracoŭnikaŭ DAI ŭ žniŭni 2020-ha.
Paśla hetaha Babak zajaviŭ, što nie moža pracavać va ŭmovach biaździejańnia justycyjanalnych orhanaŭ i maŭčańnia ŭsich adkaznych asob u adkaz na biezzakońnie na vulicach.
Apošnim časam pracavaŭ u IT-kampanii.
Ciapier čytajuć
«Adpraŭlali myć tualety i kidali ŭ ŠIZA». Susiedki raskazali pra abychodžańnie ŭ kałonii z eks-palitźniavolenaj Tamaraj Karavaj, jakaja paśla pamierła44
Kamientary