«Niepakoicca pra aharod na vioscy». Rodnyja Kastusiova ŭpieršyniu atrymali ad jaho list
Staršynia Partyi BNF Ryhor Kastusioŭ, jakoha trymajuć u SIZA KDB pa abvinavačvańni ŭ sprobie dziaržaŭnaha pieravarotu, napisaŭ dzieciam, žoncy dy ŭnukam. Heta pieršyja viestki ad jaho bolš jak za miesiac źniavoleńnia, piša Radyjo Svaboda.
Pavodle Dźmitryja Antončyka, ziacia palityka, Kastusioŭ na ŭmovy znachodžańnia ŭ niavoli nie narakaje. Piša, što ŭ jaho byli prablemy sa zdaroŭjem, ale im dali rady. Dźmitry kaža, što ŭ cieścia časta skača cisk. U liście palityk adznačaje, što hladzić biełaruskaje telebačańnie i viedaje, jak jano aśviatlaje spravu, u jakoj jon fihuruje. Na jahony pohlad, «bahata čaho pieravaročvajecca».
Dźmitry kaža, što Ryhor Kastusioŭ šmat pytaje, jak rodnyja žyvuć bieź jaho. Niepakoicca pra aharod na vioscy. U listach paznačana, što jany napisanyja 14 i 15 traŭnia. Pieršy napisaŭ darosłym, a na nastupny dzień — małym unukam.
Ryhora Kastusiova zatrymali ŭ Škłovie 12 krasavika. U toj ža dzień dačce Halinie śledčy paviedamiŭ, što jon u Miensku. 13 krasavika na leciščy palityka aperatyŭniki praviali vobšuk i zabrali kamputary, knihi, nośbity infarmacyi dy strajkbolny aŭtamat. U kvatery dzieci prykmietaŭ pieratrusu nie zaŭvažyli. Na stale lažała cydułka ź imionami, jak jany miarkujuć, tych, chto jaho zatrymlivaŭ.
22 krasavika stała viadoma, što staršynia Partyi BNF Ryhor Kastusioŭ, palitolah Alaksandar Fiaduta i juryst Jury Ziankovič abvinavačanyja ŭ zmovie z metaj zachopu dziaržaŭnaj ułady niekanstytucyjnym šlacham (č. 1 art. 357 Kryminalnaha kodeksu). 30 kastryčnika KDB nazvaŭ imiony dzieviaci abvinavačanych. Heta Alaksandar Fiaduta, Jury Ziankovič, Ryhor Kastusioŭ, Volha Hałubovič, Dźmitry Ščyhielski, Alaksandar Pierapiečka, Pavał Kułažanka, Vital Makaranka, Ihar Makar. Akramia Fiaduty, Ziankoviča i Kastusiova, u niavoli trymajuć Volhu Hałubovič.
Ciapier čytajuć
Kačanava prapanavała ŭvieści adkaznaść za «niapraŭdu ŭ tyktoku»11
Kamientary