Rasijski žurnalist, jakoha pryznali «zamiežnym ahientam», prydumaŭ, jak sapsavać žyćcio meru horada i hubiernataru
Hałoŭny redaktar haziety «Pskoŭskaja hubiernia» Dzianis Kamalahin, atrymaŭšy status «zamiežnaha ahienta», znajšoŭ numary telefonaŭ hubiernatara Pskoŭskaj vobłaści Michaiła Viadziernikava, mera Pskova Ivana Ciacierskaha i deputata Dziarždumy ad rehijona i pieravioŭ im hrošy.
Pavodle zakona ab zamiežnych ahientach, ciapier hetyja palityki padčas vybaraŭ pavinny buduć pakazvać, što źviazanyja z zamiežnym ahientam, piša «Mieduza».
«Paśla taho jak ja atrymaŭ status «zamiežnaha ahienta», ja znajšoŭ numary našaha hubiernatara, kiraŭnika administracyi, deputata Dziarždumy ad Pskoŭskaj vobłaści, raźlikovy rachunak vydaŭcoŭ praŭładnych ŚMI. Ja im adpraviŭ srodki pa numary telefona, jakija byli pryviazanyja da mabilnaha banku, — i ŭ apošniaj spravazdačy Miniustu daŭ spravazdaču, što jany atrymali finansavańnie ad «zamiežnaha ahienta».
U hety momant Dziaržduma pryniała zakon ab afilavanych z «zamiežnymi ahientami» asobach. Pa idei, hetyja tavaryšy, jakija buduć udzielničać u vybarach, nie mienš čym na 15% svajoj [rekłamnaj] płoščy pavinny pakazvać, što jany źviazany z «zamiežnymi ahientami», — padzialiŭsia Kamalahin.
Pavodle jaho słoŭ, čynoŭniki viarnuli hrošy paśla taho, jak Kamalahin apublikavaŭ danyja ab pieravodach.
«Kali ja heta apryludniŭ, deputat, kiraŭnik administracyi i hubiernatar dasłali mnie hrošy nazad, ale heta, viadoma, tak nie pracuje. I jany strašna aburalisia ŭ praŭładnych tielehram-kanałach, jakaja ja skacina. Pakul dla ich nijakich pravavych nastupstvaŭ nie nastupiła, ale jašče rana. A mnie ŭžo horš nie budzie», — upeŭnieny žurnalist.
Dzianis Kamalahin — adna ź pieršych fizičnych asob u Rasii, pryznanych «zamiežnym ahientam». Padstavaj dla hetaha stali hanarary, jakija žurnalist atrymlivaŭ ad vydańnia «Sievier.Riealii».
Zakon, jaki dazvalaje abjaŭlać «zamiežnymi ahientami» fizičnych asob, Uładzimir Pucin padpisaŭ 30 śniežnia 2020 hoda.
Novy zakon praduhledžvaje, što zamiežnymi ŚMI, jakija vykonvajuć funkcyi zamiežnaha ahienta, mohuć być pryznanyja taksama pryvatnyja asoby, kali jany pašyrajuć paviedamleńni abo materyjały (u tym liku ŭ internecie), pryznačanyja dla nieabmiežavanaha koła asob, i atrymlivajuć finansavańnie z-za miažy. Pryčym havorka moža iści jak ab hrašovych srodkach, tak i ab inšaj majomaści, atrymanaj ad zamiežnych dziaržaŭ, ich dziaržaŭnych orhanaŭ, mižnarodnych i zamiežnych arhanizacyj, zamiežnych hramadzian albo ad rasijskich jurydyčnych asob, jakija atrymlivajuć hrašovyja srodki ad nazvanych krynic.
Dla pracy ŭ RF «zamiežny ahient» abaviazany zasnavać rasijskuju jurydyčnuju asobu na praciahu adnaho miesiaca z dnia atrymańnia nazvanaha statusu, a taksama paviedamić u profilnaje viedamstva.
U vychodnych źviestkach ŚMI pavinna ŭtrymlivacca ŭkazańnie na toje, što jano stvorana ŚMI — zamiežnym ahientam. Taksama ŭvodzicca zabarona na raspaŭsiud pradukcyi ŚMI — zamiežnych ahientaŭ biez markiroŭki, u tym liku ŭ internecie.
Za parušeńnie vyznačanaha paradku dziejnaści praduhledžvajecca mahčymaść abmiežavańnia dostupu da infarmacyjnaha resursu ŚMI — zamiežnaha ahienta.
Kamientary