Šmat rečaŭ upłyvajuć na jakaść našaha snu. Siarod ich naš režym dnia, kolkaść stresu, fizičnaj nahruzki i soniečnaha śviatła, što my atrymlivajem, a taksama toje, što my jamo. Voś jak asablivaści racyjonu mohuć pahoršyć son.
Pačniom z taho, što ŭ vašym ciele jość unutrany «hadzińnik» pad nazvaj cyrkadny rytm, jaki nastrojeny indyvidualna pad vaš arhanizm. Pryjomy ježy — važnyja aryjenciry, jakija dapamahajuć arhanizmu pravilna sinchranizavać hety hadzińnik i razumieć, kali noč, a kali — dzień. Nie isnuje režymu pryjomu ježy, jaki padychodziŭ by ŭsim, tamu varta vybrać čas dla hetaha samastojna i prytrymlivacca jaho, tłumačyć VVS.
Daśledavańnie pakazała, što darosłyja, jakija mała śpiać, z bolšaj vierahodnaściu pakutujuć na niedachop kalcyju, mahniju i vitaminu D. Taksama znojdziena suviaź pamiž drennym snom i źnižanym spažyvańniem vitaminaŭ C, D, E i K.
Pakul nieviadoma, jak kankretna heta pracuje, ale ŭ lubym vypadku možna dapuścić, što bahaty na charčovyja elemienty racyjon moža dobra ŭpłyvać na jakaść snu.
Zhodna ź inšym daśledavańniem, stan kišečnaj mikrafłory taksama moža akazvać značny ŭpłyŭ na son. Kab jaho palepšyć, ekśpierty rajać spažyvać raślinnuju ježu, u tym liku arechi i ziernievyja, bahatyja na klatčatku pradukty, prabijotyki.
Što datyčycca napojaŭ, treba być aściarožnymi z harbataj, kavaj i enierhietykami. Usie hetyja napoi ŭtrymlivajuć kafiein, jaki błakuje receptary rečyva adenazin — mienavita adenazin adkazny za naša adčuvańnie stomlenaści i sanlivaści. Takim čynam kafiein pieraškadžaje pracesu zasynańnia. Jon taksama moža źnizić praciahłaść fazy hłybokaha snu, i ranicaj čałaviek nie budzie adčuvać, što jon jakasna adpačnuŭ.
Časam možna pačuć mierkavańnie, što ŭžyvańnie ałkaholu dapamahaje zasnuć. Ale heta nie tak — ałkahol parušaje paradak jak fazy hłybokaha, tak i fazy chutkaha snu, a taksama moža pavialičyć kolkaść raptoŭnych abudžeńniaŭ unačy. Ale, mahčyma, vielmi małaja doza nijak nie paŭpłyvaje na son.
Narešcie, isnujuć napoi, jakija mohuć dapamahčy zasnuć. Dla kahości heta ciopłaje małako, dla kahości — harbata, naprykład, ź miataj abo ramonkam.
Kamientary