Napiaredadni jon pravioŭ niekalki dzion u Maskvie i byŭ zatrymany pa viartańni.
Jak stała viadoma «Našaj Nivie», uviečary 15 sakavika byŭ zatrymany biznesmien Juryj Čyž. Pra heta paviedamili dźvie niezaležnyja adna ad adnoj krynicy.
Razam z Čyžom byli zatrymanyja kiraŭniki niekalkich kampanij, jakija zastalisia ŭ biznesmiena paśla razhromu jaho impieryi.
Pretenzii ŭ siłavikoŭ uźnikli da top-mieniedžmienta «Kvarckrejdaprama» — pradpryjemstva ŭ Małaryckim rajonie, jakoje zabiaśpiečvała krejdaj biarozaŭski zavod pa vyrabie budmateryjałaŭ (taksama naležyć Čyžu). Taksama nibyta zatrymany chtości z kiraŭnikoŭ «Danprada» — pradpryjemstva na Vałožynščynie, jakoje vyrablała śvininu.
Narešcie, pryjšli i ŭ «NaftaChimTrejdynh» — adzin z apošnich biznesaŭ Čyža, jaki paśpiachova praciahvaŭ pracavać. U sietki z 11 zapravak, try ź jakich znachodziacca ŭ Minsku, miesiac tamu zabrali licenziju na prodaž paliva.
Jak viadoma «Našaj Nivie», sens spravy pierahukvajecca z raniejšaj kryminalnaj spravaj suprać Čyža ŭ 2016-m — kali jaho zatrymlivali pa padazreńni va ŭchileńni ad spłaty padatkaŭ i zboraŭ u asabliva bujnym pamiery.
Tady sprava da suda nie dajšła, bo Čyž pryznaŭ vinu i kampiensavaŭ škodu. Ale jak možna mierkavać, rachunak jamu vystavili niemały i raściahnuty ŭ časie. Stanam na 2021 hod jon nibyta zastavaŭsia vinny i dziaržavie, i biznes-partnioram, jakija spahaniali z Čyža daŭhi praz sud.
Ale Čyž pa abaviazacielstvach nibyta nie płaciŭ, chacia asobnyja jašče «žyvyja» jaho biznesy prynosili hrošy.
Spravy Čyža za apošnija hady mocna pahoršali, u rejtynhu ŭpłyvovych biznesmienaŭ jon skaciŭsia na 88 miesca, choć u kancy 2000-ych uznačalvaŭ top.
Cikavy momant: katedž u Drazdach, jaki niekali naležaŭ miljanieru, a potym pierajšoŭ jaho synu Siarhieju Čyžu, try dni tamu źmianiŭ ułaśnika. Elitnuju nieruchomaść raptoŭna padaryli Palinie Čyž, žoncy Siarhieja.
Sprava ŭ tym, što padčas papiaredniaj kryminalnaj spravy suprać Juryja Čyža KDB nakłaŭ aryšt nie tolki na jaho majomaść, ale i na majomaść dziaciej.
Ciapier čytajuć
Toj samy masažyst raskazaŭ, navošta zdymaŭ hołych klijentak22
Kamientary