U Mahilovie sudziać byłoha amapaŭca i supracoŭnika słužby achovy Łukašenki: baraniŭ demanstrantaŭ

Eks-amapaŭcu pahražaje piać hadoŭ turmy pavodle abvinavačvańnia ŭ źbićci supracoŭnika milicyi, piša «Radyjo Svaboda». 

U Leninskim rajonnym sudzie Mahilova 13 listapada prajšło pieršaje sudovaje pasiadžeńnie pa kryminalnaj spravie indyvidualnaha pradprymalnika Uładzimira Šustava. Jaho vinavaciać u naŭmysnym užyvańni hvałtu ŭ dačynieńni da milicyjanta padčas razhonu ludziej 10 žniŭnia ŭ centry Mahilova (art. 364 KK RB).

Spravu razhladaje sudździa Alena Litvina.

Pavodle infarmacyi sajta 6tv.by, prakuror zapatrabavała piać hadoŭ kałonii ahulnaha režymu dla Uładzimira Šustava, u minułym kamandzira padraździaleńnia AMAP i supracoŭnika słužby achovy Łukašenki. Padsudny admaŭlaje svaju vinu.

Pavialičyć

Incydent 10 žniŭnia

Jak śćviardžaje Šustaŭ, uviečary 10 žniŭnia 2020 hoda jon razam z darosłym synam pajechaŭ u centr horada, kab vypić piva. U hety čas la Płoščy zorak, što pobač z kinateatram «Radzima», ekipiravanyja ŭ broniekamizelki, šlemy i inšuju amunicyju supracoŭniki milicyi razhaniali ludziej, jakija znachodzilisia tam. Adzin ź ich schapiŭ zzadu za horła ni ŭ čym nie vinavataha, na dumku Šustava, chłopca i pačaŭ dušyć.

Heta aburyła byłoha amapaŭca, jaki ŭbačyŭ, jak milicyjanty źbivajuć i zatrymlivajuć mirnych hramadzian. Pavodle jaho słoŭ, jon nie napadaŭ ni na koha, ale pry hetym atrymaŭ dubinkaj pa hałavie. Spatyknuŭšysia i padajučy napierad, jon zakranuŭ hałavoj tułava paciarpiełaha ŭčastkovaha inśpiektara milicyi Alaksandra Šmajankova, jaki staŭ pobač, a zatym, sprabujučy ŭtrymacca, schapiŭsia za jaho nohi. Z-za hetaha milicyjant upaŭ na jahadzicy.

Što kaža paciarpieły milicyjant

Pa słovach ža Šmajankova, jon kazaŭ Šustavu i inšym hramadzianam pakinuć Płošču zorak, pry hetym jon nikoha nie biŭ. U svaju čarhu Šustaŭ nibyta niečakana ŭdaryŭ jaho hałavoj u broniekamizelku, a potym zachapiŭ rukami nohi.

Tady ž byłoha amapaŭca i jaho syna zatrymali i asudzili da administracyjnaha aryštu pa č. 1 art. 23.34 KaAP (udzieł u niesankcyjanavanaj akcyi). Uładzimir Šustaŭ zatym staŭ fihurantam kryminalnaj spravy pavodle art. 364 KK (Hvałt albo pahroza hvałtu ŭ dačynieńni da supracoŭnika orhanaŭ unutranych spraŭ).

Sudździa adchiliła chadajnictvy Šustava

U abvinavačanaha ŭ haradskoj balnicy chutkaj mieddapamohi 10 žniŭnia dyjahnastavali strasieńnie hałaŭnoha mozhu, i jon napisaŭ zajavu ab źbićci. Vyniki pravierki pa zajavie da hetaha času ni jamu, ni jaho advakatu nie viadomyja. Šmajankoŭ ža napisaŭ pra toje, što ŭ dačynieńni da jaho byŭ užyty hvałt, tolki ŭ noč z 11 na 12 žniŭnia. Pry hetym pra jakija-niebudź cialesnyja paškodžańni va ŭčastkovaha milicyjanta havorki nie idzie.

Na sudzie byŭ prahledžany videazapis, jaki, jak śćviardžaje padsudny i jahony advakat, nijak nie adpaviadaje apisańniu i inkryminavanamu dziejańniu. Sudździa Alena Litvina 13 listapada adchiliła ŭsie chadajnictvy Šustava, pa jakich, pa jaho słovach, možna zrabić vysnovu ab jaho nievinavataści.

U sprečkach prakuror zajaviła, što ličyć vinu padsudnaha va ŭžyvańni hvałtu da Šmajankova jak da pradstaŭnika ŭłady dakazanaj i prasiła pryznačyć Šustavu piać hadoŭ kałonii ahulnaha režymu. Advakat skazaŭ, što vina jahonaha padabaronnaha nie dakazanaja, i prasiŭ pa hetaj pryčynie vynieści apraŭdalny prysud.

U svaim apošnim słovie były amapaviec paprasiŭ prabačeńnia ŭ svajoj žonki, jakaja razam z synam prysutničała ŭ zale suda. Źviartajučysia da paciarpiełaha jon skazaŭ:

«Vam dali kamandu, i vy jaje vykanali. I drenna vykanali. Vy parušyli zakon. Ja zakon nie parušaŭ. Ja nievinavaty. U mianie ŭsio».

• 0
• 0
• 0
• 0
• 0
• 0
• 1
• 0