Zapracavała płatforma «Hołas», što maje zabiaśpiečyć paralelny padlik hałasoŭ
Padčas pieradvybarčaha mitynhu Śviatłany Cichanoŭskaj u Barysavie pradstaŭniki abjadnanaha štaba raspaviali pra zapusk anłajn-płatformy «Hołas», z dapamohaj jakoj prapanujecca abaraniać hałasy na vybarach. Tut.by raskazvaje, u čym sutnaść hetaha prajekta.
23 lipienia anłajn-płatforma pačała pracu. Jak adznačajecca na sajcie prajekta, «Hołas» nie zamianiaje saboj hałasavańnie i nie źjaŭlajecca ekzitpołam: vybarcy sami paviedamlajuć pra svoj vybar. Meta prajekta — zabiaśpiečyć prazrystaść vybaraŭ biez parušeńnia zakanadaŭstva.
«My chočam pierakanacca ŭ sumlennym padliku hałasoŭ i vykarystoŭvać dla hetaha technałohii. Chto b ni pieramoh, my chočam, kab heta było sumlenna», — skazana ŭ apisańni. Pry hetym stvaralniki płatformy nie ahitujuć za kahości z kandydataŭ ci navat za jaŭku na ŭčastki. Jany prosta prapanujuć «dadatkovy paralelny padlik hałasoŭ».
Što prapanujecca zrabić vybarščykam? Pierš za ŭsio, pierajści ŭ čat z botam u Telegram abo Viber i vybrać, jak jany buduć hałasavać.
U dzień hałasavańnia varta sfatahrafavać biuleteń z vybaram i adpravić zdymak u čat z botam (heta možna zrabić i paśla 9 žniŭnia).
Padkreślivajecca, što choć hałasavańnie zhodna z zakanadaŭstvam adbyvajecca tajemna, nichto nie zabaraniaje vybarcam paviedamlać pra svoj vybar paśla zapaŭnieńnia biuletenia na vybarčym učastku.
Usie adpraŭlenyja fota zachavajucca ŭ sistemie, jakaja zatym padličyć vyniki pa kožnym učastku — vynikovyja ličby buduć apublikavanyja paśla aficyjnych vynikaŭ vybaraŭ, heta značyć, 10 žniŭnia.
«My nie pretendujem na absalutnuju dakładnaść. Vyniki nie majuć jurydyčnaj siły, usie fota dasyłajuć karystalniki. My robim usio mahčymaje, kab minimizavać niedakładnyja źviestki», —kažuć raspracoŭščyki.
Adznačajecca, što ŭsie piersanalnyja źviestki ŭdzielnikaŭ nadziejna zašyfravanyja, i navat raspracoŭščyki sistemy nie zmohuć atrymać da ich dostup. Taksama byŭ stvorany miechanizm abarony ad «nakrutak» i falsifikacyj.
Pa stanie na ranicu 24 lipienia na sajcie zarehistravałasia bolš za 80 tysiač čałaviek.
Kamientary