Załužny: Nijakich vybaraŭ padčas vajny być nie moža, nie padyhryvajcie vorahu
Były hałoŭnakamandujučy Uzbrojenych sił Ukrainy, a ciapier pasoł Ukrainy ŭ Vialikabrytanii Valeryj Załužny ŭ svaim telehram-kanale rašuča asprečyŭ čutki, što jon nibyta choča pajści ŭ aktyŭnuju palityku i zacikaŭleny ŭ jak najchutčejšym praviadzieńni prezidenckich vybaraŭ, kab na ich pieramahčy.
Załužny adznačaje, što jamu vielmi kryŭdna, kali ŭkrainskija ŚMI chutka raspaŭsiudžvajuć fejki ŭ krainie, jakaja vajuje. I źviarnuŭ uvahu, što heta robicca adnačasova z rasijskaj prapahandaj.
Jon vykazvaje škadavańnie, što miedyja nie tłumačać hramadzianam Ukrainy, jakoj stratehii im treba prytrymlivacca, kab choć by atrymać šaniec na praviadzieńnie ŭ krainie niejkich vybaraŭ. Zamiest hetaha jany, maŭlaŭ, raskazvajuć pra rejtynhi, partyi, štaby i pra toje, kamu varta ci nie varta zajmacca palitykaj.
«Ja nie pryznaju nijakich idej praviadzieńnia vybaraŭ padčas vajny. Kožny, chto atrymlivaje prapanovu ad nibyta majho proźvišča dałučycca da lubych pracesaŭ praź lubuju arhanizacyju, pavinien paviedamić pra heta pravaachoŭnym orhanam.
Ja nie stvaraju ni štaboŭ, ni partyj i pryncypova nie maju nijakich suviaziaŭ ź jakoj-niebudź palityčnaj siłaj.
Pakul u mianie jość mahčymaść słužyć dziaržavie — ja budu heta rabić. Maja pazicyja niaźmiennaja: pakul idzie vajna, vybary va Ukrainie ŭ jaje dziaržaŭnyja orhany niemahčymyja», — padkreślivaje Valeryj Załužny.
Na jaho dumku, vorah, nie zdoleŭšy pieramahčy ŭkraincaŭ na froncie, ciapier vykarystoŭvaje lubyja srodki, kab pasiejać razład u hramadstvie i padrychtavać ukraincaŭ da vybaraŭ, ale nie va ŭkrainskija orhany ŭłady, a ŭ Dziaržaŭnuju dumu Rasii — krainy, jakaja ich zabivaje.
«I, darečy — ich abjaviać u apošni raz mienavita ananimnyja krynicy. Potym — heta budzie praŭda», — piša Załužny.
Naprykancy jon kanstatuje — tolki abjadnanaja nacyja zdolnaja vytrymać, tamu treba trymać šychty.
Załužny: Ukrainu ŭratuje stvareńnie kibierfizičnaj sistemy abarony, z aporaj na robataŭ
Paśla kanfliktu ź Zialenskim Vens zvaniŭ Załužnamu. Toj nie ŭziaŭ trubku
Załužny i Zialenski zastajucca šalona papularnymi va Ukrainie
Załužny: Heta novy typ vajny. 15 km ad linii frontu — ciapier zona sucelnaj śmierci. Avijacyja i fłot stracili svajo značeńnie
Kamientary
Krutoj čieł, kak skazał pro nieho Tramp.