Запрацавала платформа «Голас», што мае забяспечыць паралельны падлік галасоў
Падчас перадвыбарчага мітынгу Святланы Ціханоўскай у Барысаве прадстаўнікі аб'яднанага штаба распавялі пра запуск анлайн-платформы «Голас», з дапамогай якой прапануецца абараняць галасы на выбарах. Tut.by расказвае, у чым сутнасць гэтага праекта.
23 ліпеня анлайн-платформа пачала працу. Як адзначаецца на сайце праекта, «Голас» не замяняе сабой галасаванне і не з'яўляецца экзітполам: выбарцы самі паведамляюць пра свой выбар. Мэта праекта — забяспечыць празрыстасць выбараў без парушэння заканадаўства.
«Мы хочам пераканацца ў сумленным падліку галасоў і выкарыстоўваць для гэтага тэхналогіі. Хто б ні перамог, мы хочам, каб гэта было сумленна», — сказана ў апісанні. Пры гэтым стваральнікі платформы не агітуюць за кагосьці з кандыдатаў ці нават за яўку на ўчасткі. Яны проста прапануюць «дадатковы паралельны падлік галасоў».
Што прапануецца зрабіць выбаршчыкам? Перш за ўсё, перайсці ў чат з ботам у Telegram або Viber і выбраць, як яны будуць галасаваць.
У дзень галасавання варта сфатаграфаваць бюлетэнь з выбарам і адправіць здымак у чат з ботам (гэта можна зрабіць і пасля 9 жніўня).
Падкрэсліваецца, што хоць галасаванне згодна з заканадаўствам адбываецца таемна, ніхто не забараняе выбарцам паведамляць пра свой выбар пасля запаўнення бюлетэня на выбарчым участку.
Усе адпраўленыя фота захаваюцца ў сістэме, якая затым падлічыць вынікі па кожным участку — выніковыя лічбы будуць апублікаваныя пасля афіцыйных вынікаў выбараў, гэта значыць, 10 жніўня.
«Мы не прэтэндуем на абсалютную дакладнасць. Вынікі не маюць юрыдычнай сілы, усе фота дасылаюць карыстальнікі. Мы робім усё магчымае, каб мінімізаваць недакладныя звесткі», —кажуць распрацоўшчыкі.
Адзначаецца, што ўсе персанальныя звесткі ўдзельнікаў надзейна зашыфраваныя, і нават распрацоўшчыкі сістэмы не змогуць атрымаць да іх доступ. Таксама быў створаны механізм абароны ад «накрутак» і фальсіфікацый.
Па стане на раніцу 24 ліпеня на сайце зарэгістравалася больш за 80 тысяч чалавек.
Цяпер чытаюць
Крык душы Жыгара пра групу Кавалеўскага: Гучаць заявы, што Лукашэнка легітымны прэзідэнт, хоць і не абраны дэмакратычна43
Каментары