У Мінску прадаюць кватэру за $2,3 мільёна. Што прапаноўваюць за такія шалёныя грошы? ШМАТ ФОТА
Кажуць, над праектам чатырохпакаёўкі працавалі французскія дызайнеры і будаўнікі. А плошча адной толькі адкрытай тэрасы больш за 90 квадратаў.
Знаходзіцца гэтая кватэра на вуліцы Філімонава ў Мінску — гэта жыллёвы комплекс «Аквамарын». Пентхаус на шостым паверсе, з яго адкрываецца шыкоўны від на Сляпянскую водную сістэму і лесапарк.
Плошча чатырохпакаёўкі каля 216 квадратаў. Прасторныя светлыя пакоі вытрыманыя ў адзіным стылі — мінімалізм з акцэнтам на натуральныя матэрыялы і спакойную колеравую гаму.
Інтэр’ер пабудаваны на гульні светлага дрэва, мяккіх тканін і акцэнтных дэталяў: вялікія панарамныя вокны і лёгкія фіранкі напаўняюць пакоі натуральным святлом.
Гасцёўня з вялізнай канапай і ўбудаванай медыязонай плаўна перацякае ў кухню.
У дзіцячых пакоях стаяць двух’ярусныя ложкі, інтэграваныя сістэмы захоўвання і месцы для гульняў.
Спальня вытрыманая ў спакойных бэжавых і шакаладных колерах.
Асаблівай увагі заслугоўвае гардэробная, якая больш нагадвае памяшканне буціка: вітрыны, падсветка і прадуманая арганізацыя захоўвання.
Памерам яна не вельмі саступае мікракватэрам у «Мінск-Свеце». Для захоўвання адзення і аксэсуараў выдзелены 21 квадрат. Улічваючы, што адзін квадрат у гэтай элітнай кватэры каштуе больш за $10500, спатрэбіцца прадаць не адну хрушчоўку недзе ў Серабранцы, каб аплаціць толькі гардэробную.
Але галоўная фішка кватэры — тэраса плошчай каля 93 квадратаў. Тут можна арганізаваць сямейную вячэру пад адкрытым небам ці загараць летам у лаўнж-зоне.
У аб'яве пазначана, што над праектам кватэры працавалі французскія дызайнеры і будаўнікі. У аддзелцы выкарыстоўваліся дарагія імпартныя матэрыялы, стаіць прэміяльная тэхніка, стол з вулканічнага каменя.
Выкуплены два памяшканні над тэрасай — гэта творчыя майстэрні. Ёсць і два машынамесцы з зараднай прыладай для электрааўтамабіляў.
Просяць за ўсю гэтую раскошу $2,3 мільёна.
Каментары