У Кітаі паліцыя «арыштавала» гуманоіднага робата, які напужаў на вуліцы пенсіянерку
Кур'ёзны выпадак адбыўся ў Макаа: паліцыянты былі вымушаныя канваіраваць па вуліцы гуманоіднага робата, які стаў прычынай шпіталізацыі 70‑гадовай жанчыны.
Каля дзевяці гадзін вечара пажылая жанчына ішла па вуліцы, уткнуўшыся ў тэлефон. Спыніўшыся, яна раптам заўважыла, што проста за спінай у яе стаіць невядомая чалавекападобная істота з агнямі, што свецяцца. Жанчына не на жарт перапужалася і пачала крычаць на машыну: «У мяне сэрца выскоквае! Ты што, звар'яцеў?»
На відэа, якое разляцелася па сеціве, відаць, як падчас крыкаў пенсіянеркі робат падымае абедзве рукі — ці то спрабуючы папрасіць прабачэння, ці то ў жэсце адчаю.
У выніку паліцыя прыехала на месца і пад рукі павяла «злачынцу». Паліцэйскі паклаў на яго руку, што зрабіла сітуацыю з робатам яшчэ больш чалавечай.
Робат належыць мясцоваму адукацыйнаму цэнтру і выкарыстоўваўся для рэкламных мэтаў.
Прадстаўнік цэнтра патлумачыў, што ніякага пераследу не было: жанчына проста загарадзіла вузкі праход, а робат, паводле сваёй праграмы, спыніўся і стаў цярпліва чакаць ззаду, пакуль шлях вызваліцца.
Нягледзячы на адсутнасць фізічнага кантакту, пенсіянерцы стала кепска, і яе адвезлі ў бальніцу для агляду. Пасля аказання дапамогі яе выпісалі.
Жанчына вырашыла не падаваць афіцыйную скаргу, а 50‑гадоваму аператару робата паліцыя вынесла папярэджанне аб неабходнасці быць больш асцярожным у грамадскіх месцах.
Цяпер чытаюць
Прапагандысты паказалі моцна схуднелага Васіля Верамейчыка13
Каментары