U Pieciarburhu zastrelili viadomaha architektara na vačach 10‑hadovaj dački. Zabojca, mierkavana, viarnuŭsia z vajny
Paśla raspravy zabojca zładziŭ pažar u kvatery i pakončyŭ z saboj.
U Pieciarburhu ranicaj 8 kastryčnika zabili viadomaha 73‑hadovaha architektara Alaksandra Supanickaha. Mužčynu zastrelili kala lifta ŭ padjeździe doma. Złačynstva adbyłosia na vačach jaho 10‑hadovaj dački, jakuju jon źbiraŭsia advieści ŭ škołu. Zabojca zmusiŭ abaich stać na kaleni, paśla čaho streliŭ Supanickamu ŭ patylicu.
Jak paviedamlaje «Fantanka», paśla zabojstva napadnik źnik, ale nieŭzabavie z apartamientaŭ paviercham nižej vyrvaŭsia dym.
Pažarnyja patušyli ahoń i vyjavili ŭnutry cieła mužčyny z ahniastrelnym ranieńniem — mierkavana, heta byŭ toj samy strałok.
«Fantanka» paviedamlaje, što zabojca moh być udzielnikam vajny va Ukrainie i mieŭ kanflikt z Supanickim.
«8 kastryčnika ŭ domie na Kramienčuhskaj vulicy byli znojdzieny cieły dvaich mužčyn, 49 i 73 hadoŭ, z ahniastrelnymi ranieńniami. Papiarednim śledstvam ustanoŭlena, što paciarpieły ranicaj vyjšaŭ pravodzić dačku ŭ škołu, kala lifta jon sustreŭ 49‑hadovaha susieda. Apošni sa svajho karabina zrabiŭ vystrał u mužčynu. Paśla ździejśnienaha złačynstva 49‑hadovy mužčyna spuściŭsia ŭ svaju kvateru paviercham nižej i źvioŭ rachunki z žyćciom», — havorycca ŭ paviedamleńni pieciarburhskaha ŭpraŭleńnia Śledčaha kamiteta.
Pa niekatorych źviestkach, napadnikam moh być 49‑hadovy Kanstancin Kozyraŭ, były namieśnik dyrektara budaŭničaha chołdynha «Pietrarest», raniej sudzimy za machlarstva ŭ asabliva bujnym pamiery. Adnak aficyjna heta pakul nie paćvierdžana.
Alaksandr Supanicki — staršynia savieta dyrektaraŭ hrupy kampanij Suart i člen Sajuza architektaraŭ SSSR. Siarod jaho viadomych rabot — prajekty stancyj pieciarburhskaha mietro «Horkaŭskaja», «Frunzienskaja» i «Park Pieramohi», aŭtasałon Rolls-Royce, a taksama ŭdzieł u stvareńni kancepcyi dziełavoha centra «Łachta».
Kamientary