Iran na 10 dzion adkryŭ Armuzski praliŭ dla ŭsich sudnaŭ. Ceny na naftu palacieli ŭniz
Na čas 10‑dzionnaha pieramirja pamiž Izrailem i Livanam Armuzski praliŭ budzie adkryty dla ŭsich sudnaŭ biez vyklučeńnia, zajaviŭ kiraŭnik iranskaha MZS Abas Arakčy ŭ sacsietcy X.
«U adpaviednaści sa spynieńniem ahniu ŭ Livanie prachod dla ŭsich kamiercyjnych sudnaŭ praz Armuzski praliŭ abjaŭlajecca całkam adkrytym na astatni pieryjad spynieńnia ahniu pa ŭzhodnienym maršrucie, jaki byŭ raniej abjaŭleny Arhanizacyjaj partoŭ i marskoha sudachodstva Isłamskaj Respubliki Iran», — napisaŭ Abas Arakčy.
Na fonie hetaj naviny ceny na naftu imhnienna palacieli ŭniz.
Červieńskija fjučarsy na naftu marki Brent upali na 10,5%, da $88,96 na fonie naviny pra adkryćcio Armuzskaha praliva, vynikaje z danych łondanskaj biržy ICE Futures.
Košt fjučarsaŭ na amierykanskuju naftu WTI na tarhach Ńju-Jorkskaj tavarnaj biržy NYMEX upaŭ na 9% i dasiahnuŭ $82,9 za baral.
Iran raniej padkreślivaŭ, što spynieńnie atak na Livan źjaŭlajecca važnaj umovaj budučaha mirnaha pahadnieńnia. Pry hetym u Tehieranie padajuć pieramirje jak pośpiech prairanskaj hrupoŭki «Chiezbała», jakaja maje značny ŭpłyŭ u Livanie.
Pra spynieńnie ahniu z 17 krasavika ŭčora zajaviŭ taksama prezident ZŠA Donald Tramp. Jon adznačyŭ, što ZŠA chočuć arhanizavać pieršuju za doŭhi čas asabistuju sustreču lidaraŭ Izraila i Livana.
Ciapier ža Tramp padziakavaŭ Iranu za adkryćcio Armuzskaha praliva ŭ paście na svajoj płatformie Truth Social, pry hetym nazvaŭšy praliŭ «pralivam Irana»:
«Iran tolki što abjaviŭ, što praliŭ Irana całkam adkryty i hatovy da svabodnaha prachodu. Dziakuj!»
Pavodle krynic vydańnia Axios, paralelna prasoŭvajucca i pieramovy pamiž ZŠA i Iranam. Abmiarkoŭvajecca mahčymaść razmarozki kala 20 miljardaŭ dalaraŭ iranskich srodkaŭ u abmien na admovu Irana ad zapasaŭ uranu.
Jeŭrapiejskija krainy i dziaržavy Piersidskaha zaliva, jakija ŭžo adčuli nastupstvy kanfliktu, zacikaŭlenyja ŭ padaŭžeńni pieramirja i zachavańni sudnachodstva praz praliŭ. Taksama płanujecca sustreča jeŭrapiejskaj kaalicyi, dzie buduć abmiarkoŭvać doŭhaterminovyja miery dla stabilnaści ŭ rehijonie.
Ciapier čytajuć
Na Alaksandru Hierasimieniu napali ŭ centry Varšavy18
Kamientary