Biełaruskija kardyjachirurhi ŭpieršyniu paśpiachova vydalili puchlinu ŭ ciažarnaj žančyny
Pra ŭnikalnuju apieracyju Ministerstva achovy zdaroŭja paviedamiła 8 kastryčnika. Chirurhi Respublikanskaha navukova-praktyčnaha centra «Kardyjałohija» praviali jaje jašče čatyry miesiacy tamu — na sercy maci ź dziciom va ŭłońni.
Jak rastłumačyli ŭ viedamstvie, heta była pieršaja takaja apieracyja ŭ historyi biełaruskaj miedycyny. U červieni 2025 hoda, kali dziciaci było tolki 23 tydni ad začaćcia, daktary znajšli ŭ levym pieradserdzi žančyny mijaksomu — dabrajakasnuju puchlinu, jakaja mahła vyklikać trombaembaliju, insult abo infarkt i pahražała žyćciu i maci, i dziciaci.
Kab vydalić utvareńnie, śpiecyjalisty praviali składanuju apieracyju na adkrytym sercy z vykarystańniem štučnaha krovazvarotu. Dziakujučy zładžanaj pracy kamandy z RNPC «Kardyjałohija» i RNPC «Maci i dzicia» na 23‑m tydni ciažarnaści pahroźlivuju situacyju ŭdałosia paśpiachova vyrašyć. Apieracyju pravodziŭ kardyjachirurh Jaŭhien Kaściukovič.
Pa infarmacyi Ministerstva achovy zdaroŭja, apieracyja i paślaapieracyjny pieryjad prajšli biez uskładnieńniaŭ. Žančyna biaśpiečna danasiła ciažarnaść da 38 tydniaŭ. 2 kastryčnika joj zrabili płanavanaje kiesarava siačeńnie, i na śviet źjaviŭsia zdarovy chłopčyk vahoj 3230 hramaŭ i rostam 52 santymietry.
8 kastryčnika maci i dzicia byli vypisanyja dadomu ŭ dobrym stanie.
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary