27‑hadovaja polka pamierła na rajskim vostravie ad ačyščalnaj dyjety. Dziaŭčyna važyła 27 kh
27‑hadovaja Karalina Kšyžak maryła pra harmoniju, zdaroŭje i žyćcio «ŭ zhodzie z pryrodaj». Jana pamierła ŭ śniežni 2024 hoda na Bali — u vile z vyhladam na vułkan i basiejnam ź biruzovaj vadoj. Jaje cieła važyła 27 kiłahramaŭ. Trahiedyja dziaŭčyny stała prykładam taho, jak sacyjalnyja sietki i niebiaśpiečnyja dyjetyčnyja trendy mohuć zabić čałavieka, piša Onet.
Dziacinstva Karaliny prajšło ŭ Varšavie. Jana była pryhožaj, adoranaj dziaŭčynaj: zajmałasia baletam, sučasnymi tancami, dobra vučyłasia. Ale ŭnutry, kažuć siabry, jaje raźjadała nianaviść da ŭłasnaha cieła.
U 15 hadoŭ jana napisała ŭ fejsbuku: «Čamu płačaš? Bo ja toŭstaja». Heta byŭ kryk padletkavaj niaŭpeŭnienaści, jaki nichto nie pačuŭ. U škole jaje chvalili za dyscyplinu i pracavitaść — jana zaŭsiody była «idealnaj». Heta i stała pastkaj.
U 18 hadoŭ Karalina pierajechała ŭ Lids (Vialikabrytanija), dzie pačała vyvučać mastactva. Tam jana adkryła dla siabie johu i viehanstva. Usio pačynałasia biaskryŭdna: zdarovy ład žyćcia, admova ad miasa, ekałohija, kłopat pra žyvioł.
Ale chutka heta pieratvaryłasia ŭ ideałohiju «ačyščeńnia».
U instahramie jana pisała: «Viehanstva adkryła mnie vočy na stolki rečaŭ. Ja adčuvaju siabie žyvoj, svabodnaj, udziačnaj».
Jaje profil staŭ vitrynaj daskanałaści — smuzi, zialonyja kaktejli, fatahrafii z malitvaj na plažy. Pad kožnym fota dziasiatki kamientaryjaŭ: «Ty vyhladaješ nievierahodna!», «Hetaja šyja, hetyja abrysy!»
Kamplimienty dziejničali jak narkotyk. Jana ŭsio mienš jeła, usio bolš «ačyščałasia». Vaha źniziłasia da 40 kiłahramaŭ, ale ŭ sacsietkach jaje chvalili: «Ty śviatło», «Ty natchnieńnie».
U 2017 hodzie Karalina paznajomiłasia ŭ internecie z fruteryjanskaj influensarkaj Daniełaj Siiraj — aŭstralijkaj, jakaja vučyła, što «syryja frukty — šlach da duchoŭnaj svabody».
Karalina, jakaja ŭžo mieła prablemy z anareksijaj i źniknieńniem mienstruacyi, spytała jaje: «Ci možna papravić zdaroŭje, kali jeści tolki frukty?»
Taja adkazała: «Tak, heta naturalnaje ačyščeńnie cieła. Boh stvaryŭ dla nas frukty, i jany heta ŭsio, što nam treba». Heta hučała jak abiacańnie vyratavańnia.
Tak pačałasia apošniaja stadyja jaje transfarmacyi — fruteryjanstva, dyjeta, u jakoj dazvalajucca tolki syryja frukty. Bieź białku, biez tłuščaŭ, biez solaŭ.
Praz hod baćki zaŭvažyli, što dačka prosta źnikaje na vačach. Jany pryvieźli jaje dadomu, arhanizavali lačeńnie, psichałahičnuju dapamohu. U 2018 hodzie jana trapiła ŭ špital z dyjahnazam parušeńnie charčovych pavodzin.
Ale jana admoviłasia pryznać chvarobu. Paśla vypiski skazała, što «daktary nie razumiejuć» duchoŭnaha ačyščeńnia».
Pačalisia svarki, kryki, ślozy. Maci płakała, prasiła jeści. Baćka zabaraniaŭ joj vychodzić. Ale Karalina była ŭpeŭnienaja, što baćki — jaje vorahi, «truciać» jaje enierhietyku.
Jana ŭsio bolš zamykałasia ŭ sabie, žyła žyćciom u instahramie.
Jaje zdymki stali strašnymi: tonkija ruki, rebry, vočy, što hareli ad fanatyzmu. Padpisčyki ŭsio jašče kazali: «Ty prykład dla nas».
Ucioki ŭ «raj»
U 2024 hodzie jana pakinuła Varšavu. Spačatku — Teneryfe. Potym, u vieraśni, Bali. Tam jana chacieła dałučycca da supolnaści «fruteryjan Ubud» — ludziej, jakija «žyvuć na śviatle i fruktach».
Pieršapačatkova jana była ŭ zachapleńni: palmy, soki, uśmieški, duchoŭnyja razmovy. Ale jaje arhanizm užo nie vytrymlivaŭ. Miascovy trenier Hrem, jaki sustreŭsia ź joj, paźniej kazaŭ žurnalistam: «Ja adrazu zrazumieŭ — heta niebiaśpieka. Jana ledź stajała, vočy byli pustyja».
Praź niekalki tydniaŭ jana ŭžo nie mahła chadzić. Zuby pačali hnić, paznohci pažaŭcieli. Siabry prapanoŭvali joj špital, ale jana admaŭlałasia: «Nie treba daktaroŭ. Heta častka ačyščeńnia».
8 śniežnia 2024 hoda Karalina zasialiłasia ŭ luksavy eka-kurort Sumberkima Hill ź vidam na vułkan i mora.
Piersanał zapomniŭ jaje — «vielmi chudaja, amal prazrystaja». Jana ledź išła, i rabotniku na recepcyi daviałosia pravieści jaje da pakoja.
Jana skazała: «Kali łaska, nie turbujcie mianie. Ja budu jeści tolki frukty. Kładzicie ich kala dźviarej».
Na nastupny dzień supracoŭniki prapanavali vyklikać doktara. Jana adkazała: «Nie treba. Usio pad kantrolem. Heta majo ačyščeńnie».
Praź niekalki dzion jana ŭžo nie vychodziła na terasu. Potym pačała klikać piersanał, kab dapamahli pakłaści jaje na łožak — jana nie mahła pavarušycca.
Kali siabroŭka z Bali nie zmahła ź joj źviazacca i paprasiła pravieryć pakoj — było pozna. Karalinu znajšli miortvaj.
«Jana lažała nieruchoma na padłozie, skura była plamistaja, vałasy — sivyja», — apisvaŭ dyrektar hatela.
Miascovy miedyk adznačyŭ vostry asteaparoz, adsutnaść białkoŭ i acioki. Jaje vaha — 27 kiłahramaŭ.
Paśla śmierci Karaliny jaje siabry z fruteryjanskaj supolnaści pačali vykładać pasty pra raskajańnie.
Danieła Siira napisała: «Ja bolš nie fruteryjanka. Ja straciła siabroŭku. My ŭsie vinavatyja, što padtrymlivali chvarobu pad vyhladam duchoŭnaści».
Tyja, chto raniej nazyvaŭ Karalinu «simvałam čyścini», ciapier pisali, što «nie zaŭvažyli niebiaśpieki». Ale było pozna.
Karalina maryła žyć na Bali, «bližej da sonca i fruktaŭ». U apošnich paviedamleńniach siabroŭcy jana pisała: «Ja bačyła šmat błohaŭ pra padarožžy. Maryła, što budu ščaślivaja, mocnaja, uśmiešlivaja, ź siamjoj u sercy».
Ale virtualny «raj» akazaŭsia pastkaj. Jana pamierła ŭ adzinocie, pakul u sacsietkach praciahvali łajkać jaje fota z podpisam: «Ješ frukty — i budzieš volny».
Ciapier čytajuć
Homielskuju sudździu, jakaja adpracavała 25 hadoŭ i zajmałasia palityčnymi spravami, vyhnali za sistematyčnyja dyscyplinarnyja parušeńni7
Kamientary
A fanatyzm, jon u va ŭsim škodny.
nabiarucca rozumu z tych padručnikaŭ - i kaniec žyćciu. Ni hatelaŭ, ni vulkanaŭ, ni basejnaŭ z fruktami.