U Rasii znoŭ adradzili sieryjał «Univier» — z byłoj deputatkaj Dziarždumy i prychilnikami vajny

Heta nie pieršaja sproba viarnuć «Univier» da žyćcia. Aryhinalny sieryjał vychodziŭ na rasijskim kanale TNT z 2008‑ha pa 2011-ty. Na jaho miesca pryjšli raznastajnyja praciahi, śpin-ofy i inšyja sproby viarnuć uvahu hledačoŭ — ahułam pad brendam «Univier» vyjšła amal 1000 kamiedyjnych sieryj. I voś ciapier pakažuć, što zdaryłasia z hierojami praz 15 hadoŭ z pačatku hetaj historyi.

Aryhinalny «Univier» byŭ raskazam pra kampaniju studentaŭ maskoŭskich VNU, jakija žyvuć u adnym błoku internata. Siarod asnoŭnych hierojaŭ byŭ syn aliharcha i budučy astranom Saša, a taksama jaho kachanaja — vydatnica Tania ź jurydyčnaha fakulteta. Jašče adzin znakavy piersanaž — Kuzia, były karatyst z uzroŭniem IQ u 60 bałaŭ, jaki mieŭ raman z błandynkaj-pryhažuniaj Ałačkaj.

Mienš efirnaha času dastałasia Hošy, mary ŭsich studentak z fakulteta žurnalistyki, jakoha zamianili na armianina Majkła. Jašče ŭ sieryjale byli akultystka Lila ź bijałahičnaha fakulteta, mažor Martynaŭ i Silviestr Andrejevič — aliharch i tata Sašy.

Va «Univier. Praz 15 hadoŭ» atrymałasia zaciahnuć asnoŭnych zorak raniejšaha prajekta. Tam jość, naprykład, Kuzia. Samy niedaloki z usich piersanažaŭ, jon niejkim čynam vybiŭsia ŭ ludzi i vałodaje kampanijaj pad nazvaj «Pielmień pielmienski». Voś tolki nijak nie moža znajści žančynu, jakaja b caniła jaho za dušu, a nie za hrošy.

Pavialičyć

U sieryjał taksama viarnuli Valancina i Mašu — byłyja batanik i studentka fakulteta žurnalistyki ź pieršaj pierazahruzki «Univiera» ciapier vychoŭvajuć dvaich dziaciej. Vala pieratvaryŭsia ŭ znakamitaha navukoŭca, zavalenaha spravami, a Maša pje doma vino i apłakvaje svoj šlub i muža, jaki nie źviartaje na jaje ŭvahi. Były łaviełas Majkł ciapier ščaślivy siemjanin, Anton vychoŭvaje čužuju dačku. Abiacajuć taksama viartańnie centralnych piersanažaŭ pieršaha «Univiera»: Sašy, to-bok taho samaha syna aliharcha, jaho žonki Tani i dźviuch seks-simvałaŭ aryhinalnaha sieryjała — Kryściny i Ałački.

Pavialičyć

Miarkujučy pa danych pošukavych sistem, novy «Univier» aktyŭna hladziać, u tym liku i ŭ Biełarusi. Praŭda, vodhuki chutčej niehatyŭnyja.

Hałoŭnaja prablema hetaha prajekta — u tym, što prajšło 15 hadoŭ, a piersanažy «Univiera» tak i nie prademanstravali zaŭvažnaha raźvićcia. Tak, Kuzia niejkim cudam maje kampaniju i hrošy, ale pa sutnaści jon, jak i raniej, zastajecca durnavatym i biezdapamožnym macakom. Maša i ŭvohule dehradavała ledź nie da ałkaholnaj zaležnaści, Vala — biescharaktarny, Majkł — chacia i paśpiachovy siemjanin, cień samoha siabie.

Bolš za toje, kali ŭ parach hierojaŭ «Univiera» zdarajucca kryzisy, adzinaje, što im prapanujuć scenarysty — chłusić i zdradžvać adno adnamu, a kali nie dapamahło, rasstavacca. Heta ŭžo nie studenty, jak raniej, ale jany tak i nie zdoleli pa-sapraŭdnamu vyraści i asvoicca ŭ darosłym žyćci. Z hadami jany stracili junackuju lohkaść i naiŭnaść, jakaja vabiła hledačoŭ pieršaha «Univiera» — i tamu, zdajecca, lepš hetych piersanažaŭ prosta adpuścić.

Jašče adna prablema «Univiera» — toje, što za apošnija hady akciory-vykanaŭcy hałoŭnych rolaŭ zdoleli mocna sapsavać uražańnie pra siabie. Uziać, naprykład, Vitala Hahunskaha, jaki ŭvasobiŭ u prajekcie Kuziu. U 2025‑m hety akcior šakavaŭ svaimi mizahinnymi vykazvańniami pra toje, što «žančyna pry mužčynie nie maje prava być u drennym nastroi».

Pavialičyć

Maryja Kažeŭnikava (Ałačka) zaniałasia palitykaj: jana naležyć da pucinskaj partyi «Adzinaja Rasija», była deputatkaj Dziarždumy i znachodzicca pad sankcyjami.

Niedaloka ad jaje syšła Hanna Chilkievič (Maša) — hetaja aktrysa nieadnarazova vykazvałasia ŭ padtrymku rasijskaha napadu na Ukrainu, u tym liku nazyvała napad baraćboj «za praŭdu». Stas Jarušyn (Anton) skardziŭsia na zachodnija sankcyi suprać Rasii i na brendy, jakija pakinuli krainu paśla pačatku poŭnamaštabnaj vajny, a taksama prasiŭ dasyłać mabilizavanym rasijanam spalnyja miachi.

Jość, adnak, siarod tvaraŭ staroha «Univiera» aktrysa, jakaja akazałasia pa inšy bok barykadaŭ. Ukrainka Hanna Kuzina stała viadomaj paśla zdymkaŭ u prajekcie «Univier. Novaja abščaha». Kuzina asudziła napad Rasii na Ukrainu ŭ krasaviku 2022-ha: jana nazvała Pucina vajennym złačyncam i končanym psichapatam.

Śviet źmianiŭsia, i jak by ni chaciełasia, užo nie viarnucca ŭ toj studencki internat kanca nulavych, dzie raspačynaŭsia pieršy «Univier». Zachavać pry hetym lohkaść staroha «Univiera» nie atrymałasia, a znajści novaje dychańnie sieryjał nie zdolny. Mahčyma, samy čas pastavić kropku.

• 3
• 5
• 4
• 9
• 1
• 0
• 1
• 0