Vyzvalenyja palitviaźni niedaličylisia hrošaj ad «Bajsoła» — u fondzie patłumačyli, jak padzialili sabranaje na zbory
19 sakavika pamiłavali 250 palitviaźniaŭ, absalutnaja bolšaść ź jakich zastalisia ŭ Biełarusi. «Bajsoł», jak i raniej, abviaščaŭ zbor na dapamohu vyzvalenym. Paabiacali pieradać hrošy i tym, chto zastaŭsia ŭ Biełarusi — ale jość pytańni pa tym, jak ich raźmiarkoŭvali.
Kožny palitviazień moža atrymać ad «Bajsoła» razavuju vypłatu sumaj 1000 jeŭra. Niechta prosić hrošy paśla vyzvaleńnia, za kahości svajaki atrymlivajuć hetu sumu jašče padčas ich źniavoleńnia — heta ahulnaja praktyka. Kali ž byłomu palitviaźniu treba dadatkovaja padtrymka, jon moža adkryć i piersanalny zbor na «Bajsole».
Paśla taho, jak biełaruskaja ŭłada pačała departavać pamiłavanych palitviaźniaŭ, «Bajsoł» ładzić da kožnaha takoha vyzvaleńnia bujnyja ekstrannyja zbory, a dalej dzielić pamiž vyzvalenymi ŭsie atrymanyja hrošy.
Naprykład, palitviaźniam z hrupy, vyzvalenaj u śniežni 2025 hoda, pieravodzili pa 2000 jeŭra. «U hetu sumu ŭvachodzić 1000 jeŭra, jakaja vypłačvajecca pa prahramie padtrymki vyzvalenych źniavolenych. Jašče 1000 jeŭra — z ekstranna sabranaj biełarusami sumy», — tłumačyła pradstaŭnica «Bajsoła» ŭ kamientary «Lusterku».
Adpaviedna, i ciapier mnohija paličyli, što kožny z 250 čałaviek moža atrymać «tradycyjnuju» 1000 jeŭra i svaju častku ad zboru. Ale, jak stała viadoma «Našaj Nivie», vyzvalenyja atrymlivajuć roŭna 1000 jeŭra — i ŭsio. Čamu tak?
Apieracyjnaja dyrektarka «Bajsoła» Hanna Dapševičucie kaža, što ekstrannyja zbory — heta jakraz častka bazavaj prahramy vypłat byłym palitviaźniam. I hetyja vypłaty składajuć 1000 jeŭra.
«Kali my robim ekstrannyja zbory, my raźmiarkoŭvajem atrymanuju sumu pamiž usimi zajaŭnikami z kankretnaj hrupy vyzvalenych viaźniaŭ, dla jakoj i raspačynaŭsia zbor. Kali byli raniejšyja vyzvaleńni, i [ułady] vyvozili ŭsich vyzvalenych biez vyklučeńniaŭ, atrymlivałasia sabrać bolš za zajaŭlenuju sumu, i my dzialili kančatkovuju sumu pamiž usimi zajaŭnikami.
Spačatku jany prychodzili sa svaimi zajaŭkami i atrymlivali, naprykład, vypłaty pa 1000 jeŭra. A potym, kali zajaŭki bolš nie prymalisia, my raźmiarkoŭvali reštu pamiž usimi, chto źviarnuŭsia pa tuju 1000».
Varta adznačyć, što raniej «Bajsoł» nikoli nie kazaŭ, što ekstrannyja zbory i prahrama vypłat niejak źviazanyja, tym bolš taja prahrama isnavała zadoŭha da pačatku departacyj. Tym nie mienš, pavodle słoŭ Hanny, heta daŭniaja praktyka:
«U nas zaŭždy pracuje hetaja prahrama vypłaty dapamohi vyzvalenym, i my prosta roznymi sposabami pryciahvajem da jaje srodki. Ekstrannyja zbory — adzin z takich sposabaŭ».
Raniej vypłaty pa 1000 jeŭra šmat u čym finansavalisia sa srodkaŭ Mižnarodnaha humanitarnaha fonda. Ciapier hrošaj ad MHF u «Bajsoła» niama.
Hanna ŭdakładniaje, što paśla vyzvaleńnia hrupy viaźniaŭ u sakaviku 2026 hoda «Bajsoł» abviaściŭ čarhovy ekstranny zbor, ale nie zdoleŭ sabrać zajaŭlenuju sumu zboru — z zapłanavanych 250 tysiač jeŭra atrymałasia sabrać tolki 104 tysiačy. Kali zajaŭnikaŭ budzie bolš za 104, «Bajsoł» dadatkova voźmie srodki ź inšych krynic — naprykład, z ahulnaha zboru:
«U nas zaŭždy jość i asabistyja zbory, i našy, ahulnyja. Naprykład, letam i vosieńniu ŭ nas byvajuć tematyčnyja zbory na dziaciej. I voś u nas pastajanna dziejničaje ahulny zbor, praź jaki my źbirajem hrošy na ŭsie našy prahramy padtrymki. Zaŭždy pracujem nad tym, kab i tudy traplali danaty. I hrošy z hetaha zboru iduć na ŭsie našy prahramy, u tym liku prahramu dapamohi palitviaźniam i vyzvalenym».
Tak ci inakš, u «Bajsole» kažuć, što 1000 jeŭra atrymajuć usie, chto pa jaje źvierniecca. A voś kali b atrymałasia sabrać bolš za 250 tysiač jeŭra, to kožny ź ich atrymaŭ by bolš.
«Naša Niva» — bastyjon biełaruščyny
PADTRYMAĆ
«A 4‑j hadzinie nočy my zrazumieli, što sierviery prosta vyčyščanyja». Jarasłaŭ Ivaniuk raskazaŭ padrabiaznaści pra ataku na anłajn-biblijateku «Kamunikat»99
Kamientary