Pałkoŭniku KDB, jaki žorstka źbiŭ dyrektara kaviarni ŭ Homieli, dali siem hadoŭ kałonii
Siońnia ŭ Homieli vynieśli prysud načalniku adnaho z padraździaleńniaŭ KDB Andreju Milčanku, jaki źbiŭ zimoj hetaha hoda dyrektara homielskaj kaviarni The box 99 Leanarda Hančaronka. Sud pryznaŭ pałkoŭnika vinavatym u naŭmysnym pryčynieńni ciažkaha cialesnaha paškodžańnia i pryznačyŭ 7 hadoŭ kałonii ŭzmocnienaha režymu, piša Tut.by.
Taksama Milčanka pavinien być pazbaŭleny zvańnia pałkoŭnika i pavinien vypłacić 45 tysiač rubloŭ maralnaj kampiensacyi.
Incydent adbyŭsia ŭviečary 8 lutaha ŭ kaviarni The box 99. Dvoje mužčyn zajšli va ŭstanovu, zamovili picu, zatym padsieli da naviedvalnic.
— Jak paźniej mnie raspaviali rabotniki, za stolikam siadzieli try dziaŭčynki hadoŭ pa 16-17 hadoŭ, hetyja dvoje da ich padsieli i stali znajomicca. Mužykam hadoŭ pa 45, i dziaŭčatki nie zachacieli razmaŭlać. Tyja stali zalacacca. Chłopiec, jaki siadzieŭ za susiednim stałom, paviedamiŭ pra heta našym supracoŭnikam. U zału vyjšaŭ baćka, dyrektar, słova za słova, naviedvalniki paprasili jaho vyjści ź im na vulicu. Baćka vyjšaŭ, jaho stali źbivać, — raspaviadaŭ TUT.BY syn paciarpiełaha Dźmitryj.
Čałaviek na videa, jaki nanosiŭ udary 49-hadovamu dyrektaru kafe, — načalnik 4-ha adździeła UKDB pa Minsku i Minskaj vobłaści pałkoŭnik Andrej Milčanka. Paśla šumichi mužčyna sam pryjšoŭ u milicyju z pavinnaj. U kaviarni ź im byŭ 42-hadovy žychar stalicy. U spravie jon prachodzić jak śviedka. Na pieršaje sudovaje pasiadžeńnie ŭ Homielskim abłasnym sudzie presu nie puścili — sud zrabili zakrytym.
— Sprava niezvyčajnaja, tut prysutničajuć materyjały, jakija ŭjaŭlajuć dziaržaŭnuju tajamnicu, — patłumačyła abaronca paciarpiełaha.
Sam paciarpieły — Leanard Hančaronak — na praciahu ŭsiaho pracesu taksama admaŭlaŭsia ad jakich-niebudź kamientaroŭ.
Kamientary