«Mnie prapanavali addać podpisy z parłamienckich vybaraŭ, kab ich vykarystali ŭ prezidenckaj kampanii Karatkievič»
Paśla publikacyi materyjała «Matolka suprać Dźmitryjeva: Hety niedapalityk stvaryŭ štuk piać chajpovych pietycyj. Kudy pojduć podpisy?» u redakcyju «NN» źviarnuŭsia žychar Staŭbcoŭskaha rajona Juryj Ivanoŭski, kab raskazać svaju historyju.
Juryj Ivanoŭski pracuje fiermieram, maje haspadarku «Pan Ježy», jakaja śpiecyjalizujecca na vyroščvańni piekinskaj kapusty. Letaś jon vyrašyŭ stać kandydatam u deputaty pa Staŭbcoŭskaj vybarčaj akruzie. Ale pakolki nie źjaŭlajecca siabram palityčnych partyj, pajšoŭ na vybary praz zbor podpisaŭ.
U vyniku Ivanoŭski zdaŭ patrebnuju 1000 podpisaŭ, ale ŭčastkovaja kamisija ich zabrakavała. Paśla hetaha fiermier dapamahaŭ pradstaŭniku «Havary praŭdu» Mikałaju Łysionkavu.
«U hetaj situacyi ja chaču padtrymać Antona Matolku. Situacyja nastupnaja: adnosna niadaŭna na mianie vyjšaŭ Mikałaj Łysionkaŭ i prapanoŭvaŭ addać maje staryja sabranyja podpisy dla «Havary praŭdu», kab jany ich vykarystali ŭ prezidenckaj kampanii Taćciany Karatkievič. Naturalna, ja admoviŭsia heta zrabić. Ciapier z šerahu pryčynaŭ nie mahu bolš supracoŭničać z Łysionkavym», — kaža Juryj Ivanoŭski.
«NN» źviazałasia i sa spadarom Łysionkavym, kab toj rastłumačyŭ, što staić za hetym kanfliktkam? Mikałaj kaža, što jon i jahonyja ludzi dapamahali Juryju Ivanoŭskamu sa zboram podpisaŭ. «Ja apazicyjny kandydat, jon apazicyjny kandydat, to my abjadnali našy namahańni. Ja išoŭ ad palityčnaj partyi, tamu nie tak važnyja byli podpisy», — kaža Łysionkaŭ.
Razmova ab tym, kab Ivanoŭski pradstaviŭ Łysionkavu podpisy, sapraŭdy viałasia. «Ja chacieŭ atrymać kopiju tych podpisaŭ, jakija sabrali ja i maja kamanda, ale mnie ich tak i nie dali. I zusim nie dla taho, kab prosta pierapisać hetyja źviestki dla CVK. Heta patrebna dla budučaj pracy. Hladzicie, u hetym domie za apazicyjnaha kandydata padpisałasia dvaccać čałaviek, a ŭ hetym — try. Kudy ja chutčej pajdu znoŭ?» — kaža Łysionkaŭ.
«Kali tam užo padpisvalisia za apazicyjnaha kandydata, to pavinny i padpisacca za apazicyjnaha kandydata na prezidenckich vybarach», — upeŭnieny aktyvist.
Kamientary