Paŭličenka vielmi dziŭna prakamientavaŭ abvinačvańni ŭ datyčnaści da zabojstva Zacharanki i Hančara. Pa-roznamu roznym ŚMI

Eks-kamandzir vajskovaj čaści 3214, eks-kamandzir Śpiecyjalnaha atrada chutkaha reahavańnia Dźmitryj Paŭličenka na praciahu dziesiaci chvilin daŭ dva kamientary — «Našaj Nivie» i Tut.by — z absalutna roznym źmiestam.

Jon adkazvaŭ na słovy svajho byłoha padnačalenaha Juryja Haraŭskaha, jaki abvinavačvaje Paŭličenku ŭ zabojstvie Juryja Zacharanki, Viktara Hančara i Anatola Krasoŭskaha.

Były śpiecnazaviec: Ja ŭdzielničaŭ u zabojstvie Zacharanki i Hančara

Pavialičyć

Spačatku Paŭličenka vykazaŭsia dla partała Tut.by:

— Haraŭski adsłužyŭ paŭtara hoda terminovaj słužby, a potym zhańbiŭ [unutranyja vojski]. Nijakaha dačynieńnia da SACHRa jon nie maje. U nas [ŭ 1998 hodzie] adkryŭsia štat kantraktnikaŭ, u jaho asablivaha intelektu nie było, chłopiec zdarovy, ale peŭnyja navyki byli, i ŭ rukapašnym bai, i my jaho ŭziali. Ale SACHR farmavaŭsia ŭ 1999 hodzie. A jon u hety čas, u 1999 hodzie, trapiŭ pad kryminalnuju adkaznaść — zajmaŭsia vymahalnictvam. Jaho brała ŭ raspracoŭku Hałoŭnaje ŭpraŭleńnie pa baraćbie z arhanizavanaj złačynnaściu i karupcyjaj, zatrymlivaŭ «Ałmaz» — tam usio było surjozna. Tamu, kali niejkija padziei i adbyvalisia [ŭ 1999 hodzie], da jakich SACHR nie maje dačynieńnia, jon adbyvaŭ pakarańnie.

U KDB na Haraŭskaha jość daśje. Jon nijakaha dačynieńnia da SACHRa nie maje, jon zhańbiŭ našy šerahi, zaniaŭsia złačynnym biznesam — vymahalnictvam hrošaj u prostych hramadzian, prykryvajučysia, što jon supracoŭnik [MUS]. My jaho sa svaich šerahaŭ vyhnali, jon adsiedzieŭ try ci čatyry hady. Sieŭ jon u 1999 hodzie.

— Ale jon śćviardžaje, što byŭ bajcom SACHRA z 1999 pa 2003 hod.

— Takoha być nie moža, jon u hety čas adbyvaŭ pakarańnie. Niahledziačy na ​​toje, što adbyvaŭ pakarańnie, svoj — nie svoj, ale słužyŭ ža ŭ nas, i ja jamu dapamoh uładkavacca na pracu. Jon tam [na pracy] znoŭ dapuściŭ niejkija machinacyi, i jaho i adtul vyhnali. Potym jon pjanym za rulom trapiŭ u avaryju i staŭ kalekam. Ja taksama znajšoŭ sposab, u nas tak pryniata, ja mnohich padtrymlivaju — ja ŭznačalvaju Biełaruskuju asacyjacyju vieteranaŭ i ŭ mianie šmat na apiecy chvorych i kalek znachodzicca, taksama znajšoŭ sposab jaho padtrymać. Ale čałaviek [Haraŭski] sprabuje zarabić na hetym usim. Čałaviek prosta straciŭ sumleńnie i aryjenciry. Za 20 hadoŭ było šmat publikacyj, ja ŭžo nahledzieŭsia. Nijakich tajamničych apieracyj nie było.

— Heta značyć, vy śćviardžajecie, što SACHR pad vašym kamandavańniem nie ŭdzielničaŭ u apieracyjach pa vykradańni i zabojstvie Zacharanki, Hančara i Krasoŭskaha, pra jakija raspaviadaje Haraŭski?

— Heta poŭnaja łuchta niejkaja. Nu, moža być, niechta niečym hetym zajmaŭsia. My — śpiecpadraździaleńnie śpiecpryznačeńnia ŭnutranych vojskaŭ, hetyja voś pytańni ŭ kampietencyi inšych orhanaŭ, kali jany hetym zajmalisia.

***

A praz 10 chvilin jon adkazaŭ na zvanok karespandenta «Našaj Nivy».

— Taki čałaviek pad maim kiraŭnictvam nie słužyŭ. Ja asabista stvaraŭ Śpiecyjalny atrad chutkaha reahavańnia (SACHR). I cudoŭna pamiataju ŭsich, asabliva z tych, chto stvaraŭ. Nijakaha Haraŭskaha tam nie było. Moža, u 3214 i byŭ taki čałaviek, tam usich nie zapomniš… Ale ja nie viedaju takoha Juryja Haraŭskaha. A što jon takoha napisaŭ, niešta, što ačarniaje našu realnaść?

— Napisaŭ, što ŭ 2000-m hodzie vas razam zatrymlivali pa spravie zabojstva Hančara i Zacharanki. Jaho na adnyja sutki, a vas na troje.

— Takoha dakładna nie pamiataju. Razumiejecie, jość ludzi, jakija kaliści dzieści słužyli albo ŭvohule nidzie nie słužyli, a paśla jany ci zarablajuć hetym, ci ŭvahu da siabie pryciahvajuć. Usio heta tryźnieńnie. 

• 0
• 0
• 0
• 0
• 1
• 0
• 1
• 0