Na jutub-kanale niamieckaha ŚMI «Dojče Viele» źjaviłasia videaintervju z byłym bajcom śpiecyjalnaha atrada chutkaha reahavańnia Juryjem Haraŭskim, u jakim jon pryznajecca, što ŭdzielničaŭ u zabojstvie Juryja Zacharanki, Viktara Hančara i Anatola Krasoŭskaha.
Na siońnia Haraŭski žyvie ŭ niamieckamoŭnych Alpach, ale z pryčyn biaśpieki kraina nie nazyvajecca.
Paśla słužby ŭ vojsku Haraŭski trapiŭ u śpiecnaz. «Byŭ vusny zahad. Kali b ja admoviŭsia, to znajšoŭsia b niechta inšy», — kaža jon.
U 2008 hodzie Haraŭski trapiŭ u zahadkavuju avaryju, u jakoj moh zahinuć. Jon paškodziŭ ściahno, jakoje i pryjechaŭ lačyć u Alpy. Mužčyna paprasiŭ palityčny prytułak.
Haraŭski kaža, što daŭno źbiraŭsia «skinuć kamień z dušy». U filmie jon demanstruje paśviedčańnie asacyjacyi vieteranaŭ unutranych vojskaŭ.
Jon pakazvaje ŭ videa śpis usich ludziej, jakija ŭdzielničali ŭ śpiecapieracyi pa likvidacyi Zacharanki i Hančara z Krasoŭskim.
«Zacharanka nie supraciŭlajecca, jon tolki prosić vykradalnikaŭ: «Zrabicie tak, kab mnie nie było baluča», — kaža zakadravy hołas. Aŭtamabil vyjechaŭ na poŭnač ad Minska.
Haraŭski ŭ efiry demastruje spadarožnikavy zdymak vajskovaj bazy ŭ Biahomli. «Tut zabili Hančara i Krasoŭskaha, — kaža jon. — A tut była jama, dzie spalili ich adzieńnie».
«Nam patłumačyli, što ŭ Hančara byŭ kampramat na Łukašenku, što jon niesumlenna pryjšoŭ da ŭłady. U suviazi z hetym kampramatam my jaho likvidavali», — kaža Haraŭski.
Mužčyna kaža, što adčuvaje vinu. «Kali b hetyja mužčyny zastalisia žyvymi, to niešta inakš było b u Biełarusi».
Zacharanku pryvieźli na vučebny palihon Vałoŭščyna pad Zasłaŭjem. Raskazvajecca, što zabivali jaho śpiecyjalnym «rasstrelnym pistaletam». Ale paśla zabojstva nibyta pavieźli nazad u Minsk. Na Paŭnočnych mohiłkach cieła addali ŭ krematoryj. Što było paśla, Haraŭski nie viedaje.
Pierad tym, jak zatrymać Zacharanku, jaho adsočvali paŭtara tydnia. «Ja z Paŭličenkam byŭ u mašynie, plus jašče siadzieli Baradač Jura i Škindzieraŭ Siarhiej. U druhoj mašynie — Karpovič Dzima, Navatarski, Kažeŭnikaŭ, Pankoŭ i Rumiancaŭ Loša». Haraŭski adkryta nazyvaje imiony ŭdzielnikaŭ.
Były bajec śpiecnazu abvinavačvaje Dźmitryja Paŭličenku ŭ zabojstvie. Maŭlaŭ, jon dva razy strelnuŭ u rajon serca. Z Zacharanki navat nie zdymali čorny bałachon, u jakim vieźli ŭ mašynie. Mužčyna adkidaje viersiju pra toje, što Zacharanku adsiekli ruku, a niechta zdymaŭ heta na videa.
Pra likvidacyju Hančara i Krasoŭskaha Haraŭski kaža, što paśla taho, jak ich zatrymali, niejki čałaviek u cyvilnym praviaraŭ, ci sapraŭdy heta jany.
Haraŭski śćviardžaje, što Krasoŭski i Hančar atrymali pa dźvie kuli ŭ rajon serca ad ruk Dźmitryja Paŭličenki. Śpiecnazaviec śćviardžaje, što trymaŭ pistalet da zabojstvaŭ u siabie, bo Paŭličenka, maŭlaŭ, nie lubiŭ trymać zbroju.
Cikava, što jon nazyvaje navat takija rečy, jak toje, što ŭ Hančara na nazie nie było adnaho z palcaŭ, a ŭ abutku była artapiedyčnaja ściłka. «Ja nios Hančara za levuju ruku, sa mnoj nios Jura Baradač», — kaža Haraŭski.
Na nastupny dzień BTR razdušyŭ džyp Krasoŭskaha, reštki mašyny zakapali.
Haraŭski śćviardžaje, što asoby Hančara i Krasoŭskaha jon na toj momant nie viedaŭ, u adroźnieńnie ad Zacharanki. Maŭlaŭ, praź niejki čas Paŭličenka pryvioz za hetuju apieracyju ŭdzielnikam pa tysiačy dalaraŭ.
Mužčyna kaža, što 14 udzielnikaŭ apieracyi mohuć paćvierdzić jahonuju historyju. Amal usie jany zastalisia słužyć u siłavych strukturach.
Pamiž saboj śpiecnazaŭcy hetaha nikoli nie abmiarkoŭvali. Pry zvalnieńni Haraŭski padpisvaŭ rapart «Ab nierazhałošvańni vajskovaj tajamnicy».
Śpiecnazaviec kaža, što ŭ likvidacyi apieratara Źmitra Zavadskaha jon nie ŭdzielničaŭ, ale sasłužboŭcy ŭ toj dzień vychodzili na pracu, choć i nie musili. Haraŭski pierakanany, što Juryj Sivakoŭ i Viktar Šejman viedali pra dadzienuju situacyju. Ci viedaŭ Łukašenka, śpiecnazaŭcu ciažka adkazać.
Haraŭski byŭ zatrymany ŭ 2000-m hodzie razam ź Dźmitryjem Paŭličenkam, ale vyjšaŭ praź dzień. Jahony kamandzir — praz try.
Haraŭski abiacaje paćvierdzić usio skazanaje ŭ sudzie.
Ciapier čytajuć
«Napisali, jak ja chaču viarnucca ŭ śviatuju Rasiju». Prapahanda pierakruciła žart biełaruski i prydumała fejk pra zahnivajučuju Amieryku1
«Napisali, jak ja chaču viarnucca ŭ śviatuju Rasiju». Prapahanda pierakruciła žart biełaruski i prydumała fejk pra zahnivajučuju Amieryku
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary