Nastupnymi haściami ŭ intelektualnym kłubie Śviatłany Aleksijevič stanuć viadomyja litoŭskija dramaturh i režysior
Čarhovaja sustreča projdzie 21 kastryčnika ŭ 19.00 ŭ Teatry biełaruskaj dramaturhii (Krapotkina, 44).
Maryus Ivaškiavičus i Oskaras Karšunovas — amal ravieśniki, adnamu 45 hadoŭ, druhomu 46. I jany ščaśliva znajšli adzin adnaho. Kožnaja ich sumiesnaja praca — padzieja ŭ teatralnym śviecie.
Maryus Ivaškiavičus naradziŭsia ŭ nievialikim litoŭskim miastečku Malaty, ale ŭsia historyja jaho siamji składanymi zabłytanymi šlachami źviazana ź Biełaruśsiu. U im try čverci biełaruskaj kryvi, jakaja čas ad času nahadvaje pra siabie. Siońnia Ivaškiavičus — viadučy litoŭski dramaturh. Śpiektakli pa jaho pjesach iduć u jeŭrapiejskich teatrach.
U 2016 hodzie Litoŭskaje radyjo («LRT Radijas») abviaściła Marusa Ivaškiavičusa «Čałaviekam hoda» za hramadzianskuju inicyjatyvu — pa jaho zakliku kala paŭtysiačy čałaviek roznaj nacyjanalnaści z Malaty, inšych haradoŭ Litvy i inšych krain prajšli Maršam pamiaci da miesca zabojstva kala dvuch tysiač tutejšych habrejaŭ.
Oskaras Karšunovas — čałaviek, bieź jakoha niemahčyma ŭjavić sučasny jeŭrapiejski teatr. Łaŭreat mnostva premij u halinie kultury i mastactva, kavaler ordenaŭ Palarnaj zorki Šviedskaha karaleŭskaha doma, Załatoha kryža prezidenta Polščy, francuzskaha ordena Mastactvaŭ i litaratury. Sa svaimi śpiektaklami Oskaras Karšunovas udzielničaŭ u najbujniejšych i najvažniejšych teatralnych fiestyvalach, a Litvie padaryŭ tradycyjny mižnarodny teatralny fiestyval «Sireny», jaki prachodzić u Vilni vosieńniu.
U 1999 hodzie zasnavaŭ ułasny teatr (Teatr Oskarasa Karšunovasa), jaki abjeździŭ uvieś śviet. U Karšunovasa taksama jość biełaruskija karani. Dzied jaho rodam z-pad Mahilova.
— Ja chaču pastavić «Čarnobylskuju malitvu» Śviatłany Aleksijevič, — kaža jon. — Čarnobylskaja trahiedyja adhukajecca ŭ maim sercy, i heta nie prosta słovy. Majo pakaleńnie vydatna pamiataje 26 krasavika 1986 hoda: my ź siabrami hulali ŭ dvary ŭ baskietboł, kali pačaŭsia doždž. U toj čas u Vilni była krama «Minsk» — my pabiehli chavacca ad daždžu pad jaho dacham. Paźniej nam skazali, što na ČAES adbyŭsia vybuch, a doždž, pad jaki my patrapili, byŭ radyjeaktyŭny. Tema atamnaj enierhietyki da hetaha času vielmi aktualnaja ŭ Litvie (u 2009 hodzie była začyniena Ihnalinskaja atamnaja elektrastancyja, dla čaho byli vyłučanyja niekalki miljardaŭ eŭra. A ciapier za šeśćdziesiat kiłamietraŭ ad Vilni ŭzvodazicca AES…
Hetaja sustreča — vielmi redkaja mahčymaść ubačyć i pačuć dyjałoh dvuch samych zapatrabavanych jeŭrapiejskich režysiora i dramaturha.
Uvachod volny
Kolkaść miescaŭ abmiežavana
Ciapier čytajuć
Stancyju mietro na praśpiekcie Pieramožcaŭ pieradumali budavać?1
Kamientary