U Maskvie zabity viadomy advakat Stanisłaŭ Markiełaŭ

Markiełaŭ baraniŭ siamju čačencaŭ Kunhajevych. Aproč taho, jon u svoj čas baraniŭ u Maskvie Ju.Ivaniukoviča, jaki napisaŭ na šyldzie biełaruskaha pasolstva «Žyvie Biełaruś», a taksama našych suajčyńnikaŭ, što asudzili na 9 hadoŭ za kantrabandu tabletak ad kašlu.

Stanisłaŭ Markiełaŭ byŭ zabity ŭ paniadziełak siarod dnia ŭ samym centry horada — kala doma №1 na vulicy Pračyścienka, paviedamiŭ žurnalistam kiraŭnik maskoŭskaha ŭpraŭleńnia Śledčaha kamiteta pry prakuratury Rasii Anatol Bahmiet. Jon nie vyklučyŭ, što zabojstva advakata źviazana ź jaho prafiesijnaj dziejnaściu.

U interviju radyjo «Echo Moskvy» baćka zabitaj dziaŭčyny Visa Kunhajeŭ paviedamiŭ,

što apošnim časam na adras Markiełava pastupali šmatlikija pahrozy.

Markiełaŭ byŭ zabity strełam u hałavu ź pistaleta z hłušylnikam.

Pry napadzieńni na advakata była paraniena dziaŭčyna — pavodle papiarednich źviestak, žurnalistka «Novoj haziety». Jana dastaŭlena ŭ balnicu z ahniastrelnym ranieńniem hałavy.

Uviečary Nastaśsia Baturava pamierła.

Mižnarodnaja pravaabarončaja arhanizacyja Human Right Watch pastaviła zabojstva Stanisłava Markiełava ŭ adzin šerah z zabojstvam žurnalistki Hanny Palitkoŭskaj.

* * *

Stanisłaŭ Markiełaŭ pradstaŭlaŭ intaresy paciarpiełych ŭ hučnaj spravie ab zabojstvie čačenskaj dziaŭčyny Elzy Kunhajevaj.

Vinavatym u zabojstvie byŭ pryznany pałkoŭnik Jury Budanaŭ. Jon byŭ asudžany na 10 hod pazbaŭleńnia voli, i ŭ minuły čaćvier sud zadavoliŭ jaho chadajnictva ab umoŭna‑daterminovym vyzvaleńni (UDV).

Stanisłaŭ Markiełaŭ apratestavaŭ rašeńnie pra UDV.

Bi-Bi-Si

***

Stanisłavu Markiełavu było 34 hady. Jon uznačalvaŭ Instytut viaršenstva prava, ładziŭ pravaabarončyja sieminary, pryjaždžaŭ ź lekcyjami, u tym liku, paviedamlajecca, što ŭ Minsk.

Markiełaŭ u rozny čas baraniŭ intaresy svajakoŭ achviaraŭ «Nord-Osta», čačencaŭ, što paciarpieli ad ruk supracoŭnika Chanty-Mansijskaha AMONu, hałoŭnaha redaktara haziety «Chimkinskaja pravda» Michaiła Biekietava, jakoha letaś źvierski źbili nieviadomyja, i siemjaŭ antyfašystaŭ i mihrantaŭ, što zahinuli ad ruk maskoŭskich skinchiedaŭ.

***

Stanisłaŭ Markiełaŭ baraniŭ uvosień 2007 h. u Basmannym sudzie rasijskaj stalicy biełarusa Jurasia Ivaniukoviča,

Advakat Markiełaŭ nastojvaŭ na tym, što ŭčynienyja maładym čałaviekam dziejańni nie mahli kvalifikavacca inakš jak administratyŭnaje pravaparušeńnie.

Stanisłaŭ Markiełaŭ taksama baraniŭ biełarusaŭ, jakich asudzili ŭ Maskvie na 9 hadoŭ za kantrabandu tabletak ad kašlu.

***

Sprava Budanava

Uletku 2003 h. Budanaŭ byŭ pryznany vinavatym u zabojstvie čačenki 18-hadovaj Elzy Kunhajevaj, jakoje adbyłosia ŭviesnu 2000 hodu.

31 śniežnia 2002 h. vajenny sud pryznaŭ Budanava nienarmalnym u momant ździajśnieńnia złačynstva, vyzvaliŭ jaho ad kryminalnaj adkaznaści i napraviŭ na mrymusovaje lačeńnie.

Ale 28 lutaha 2003 hodu Viarchoŭny sud admniaiŭ heta rašeńnie i viarnuŭ spravu ŭ Paŭnočna‑Kaŭkazski akruhovy vajenny sud, jaki pryznaŭ Budanava vinavatym u vykradańni i zabojstvie dziaŭčyny i prysudziŭ da 10 hadoŭ pazbaŭleńnia voli, pazbaviŭšy jaho taksama zvańnia pałkoŭnika i dziaržaŭnych uznaharod.

Budanaŭ byŭ u źniavoleńni 8,5 hadoŭ.

Sud čatyry razy adchilaŭ jaho chadajnictvy ab umoŭna‑daterminovym vyzvaleńni.

Pałkoŭnik Budanaŭ, darečy, taksama abvinavačvaŭsia ŭ zhvałtavańni Elzy Kunhajevaj, ale potym abvinavačańnie było ź jaho źniata. Zhvałtavańnie (dakładniej ździek ź miortvaha cieła) uziaŭ na siabie šarahoviec Alaksandr Jahoraŭ, jaki byŭ potym amnistavany (jon na sudzie zajaviŭ, što rabiŭ heta z dapamohaj sapiornaj rydloŭki, choć ni da hetaha, ni paśla nijakich psichičnych adchileńniaŭ u jaho nie było zaŭvažana).

• 0
• 0
• 0
• 0
• 0
• 0
• 0
• 0