Čałaviek hoda pa viersii «Našaj Nivy» — Maryna Zołatava

Čałaviekam hoda ŭ Biełarusi my vyrašyli pryznać hałoŭnuju redaktarku Tut.by Marynu Zołatavu. Čym kiravałasia «Naša Niva», robiačy taki vybar?

U XXI stahodździ infarmacyjnaja biaśpieka krainy značyć nie mienš za vajskovuju. Taksičnaja prapahanda rasijskaha telebačańnia ŭ toj ci inšaj stupieni ŭździejničaje na rozumy sotniaŭ tysiač biełarusaŭ, prasoŭvajučy idei «ruskaha śvietu», i dziaržaŭnyja telekanały mała što mohuć supraćpastavić joj. U takoj situacyi na piaredni płan vychodziać niezaležnyja biełaruskija internet-resursy, jakija prapanujuć hramadstvu svoj paradak dnia. Najbujniejšaje siarod nacyjanalnych miedyja — Tut.by. Kožny budni dzień na jaho zachodziać kala 1,3 miljona čałaviek. Pośpiech Tut.by składajecca z mnostva faktaraŭ, ale adzin ź ich nieasprečny — prafiesijanalizm redakcyi na čale z Marynaj Zołatavaj.

Sioleta jaje pracu «acanili» jašče i kankurenty ź dziaržaŭnych vydańniaŭ. U situacyi, kali za kratami nie zastałosia palityčnych apanientaŭ režymu, hałoŭnaj cellu była abrana mienavita Zołatava.

Hladzicie: «Tok» z Zołatavaj i Leŭšynaj: pra «spravu BiełTA», cenzuru i ahienturu VIDEA

Absurdnaja «sprava BiełTA» ź pieratrusami i źniavoleńniem žurnalistaŭ i redaktaraŭ niezaležnych ŚMI vyklikała zachapleńnie rasijskich impierskich resursaŭ. «Začystka nieabanderaŭskich ŚMI ŭ respublicy», — u ekstazie pisali jany.

«Sprava BiełTA» ŭdaryła pa dziasiatku žurnalistaŭ, ale ŭ vyniku abvinavačanaj zastałasia tolki Maryna Zołatava. Ci nie dla taho, kab zastrašyć i niejtralizavać mienavita jaje, prydumlałasia hetaja chitraja kryminalnaja sprava?

My musim skazać, što vybar Čałavieka hoda nie byŭ dla Redakcyi «Našaj Nivy» adnaznačny. U časie abmierkavańnia stvaralnikam Tut.by stavili ŭ vinu, što ŭ pahoni za kamiercyjnymi pieramohami jany nie tolki manapalizavali rynak, ale i mižvoli zrabili svoj resurs adnym ź instrumientaŭ rusifikacyi hramadstva. Budziem ličyć, što heta doŭh, jaki Tut.by niekali biełaruščynie spłacić.

Čytajcie taksama: Piać faktaŭ pra zatrymanuju hałoŭnuju redaktarku TUT.by Marynu Zołatavu

Ludzi hoda «NN» u papiarednija hady 

2005 — palityk Alaksandr Milinkievič 

2006 — čałaviek Płoščy

2007 — maładafrontaviec 

2008 — trenier Viktar Hančarenka 

2009 — Natałka Vasilevič i inšyja dabračyncy 

2010 — padpałkoŭnik milicyi ŭ adstaŭcy Mikałaj Kazłoŭ 

2011 — muzyka Siarhiej Michałok 

2012 — ludzi, što viarnuli ŭ Biełaruś Statut VKŁ: Alaksiej Baciukoŭ, Źmicier Jackievič, Andrej Radkoŭ 

2013 — biełaruskamoŭnyja dzieci 

2014 — Franak Viačorka i inšyja papularyzatary vyšyvanki 

2015 — Śviatłana Aleksijevič

2016 — Kaciaryna Siniuk

2017 — Pavieł Kałaŭr

2018 — Maryna Zołatava

Apytanka

• 0
• 0
• 0
• 0
• 0
• 0
• 0
• 0