Biełaruś śpikiravała na 27-je miesca ŭ rejtynhu samych pituščych krain śvietu. Jak tak adbyłosia?
Choć hod tamu nibyta zajmała sumnaje 2-je miesca.
Usia sprava — u padlikach. Nie fakt, što raniejšaje 2-je miesca my «zasłužyli».
Nahadajem, hod tamu biełarusaŭ pastavili na 2 miesca suśvietnaha rejtynhu pa spažyvańni ałkaholu (na pieršym była Litva). Sioleta my tolki 27-ja, a kolkaść vypitaha źmienšyłasia amal na tracinu.
My stali mienš pić? Nasamreč, nie. Dy i rejtynh navat nie za minuły hod, a za 2016.
Sprečny momant u tym, što Biełstat i Suśvietnaja arhanizacyja achovy zdaroŭja prosta pa-roznamu padličvajuć kolkaść spažytaha ałkaholu.
Biełstat robić svaje vysnovy zhodna z kolkaściu pradadzienaha ałkaholu. I tut zusim inšyja ličby — mienšyja. A Suśvietnaja arhanizacyja achovy zdaroŭja abapirajecca na acenki ekśpiertaŭ. I jaje vyniki daŭno vyklikajuć abureńnie, pryčym nie tolki «lidaraŭ» rejtynhu.
Tak, pa dadzienych Biełstata, u 2016 hodzie biełarusy spažyli 8,8 litra na čałavieka. U svaju čarhu Suśvietnaja arhanizacyja achovy zdaroŭja zajaŭlaje, što na žychara krainy va ŭzroście ad 15 hadoŭ pryjšłosia 11,2 litra.
Cikava, što minuły rejtynh — toj, dzie my byli na 2-m miescy, — taksama dastatkova sprečny, bo toje byŭ prahnoz pa spažyvańni ałkaholu na 2016 hod.
U 2017 hodzie ministr achovy zdaroŭja Biełarusi Valery Małaška ŭžo akcentavaŭ uvahu na hetym momancie, ale taksama adznačaŭ, što navat pa rejtynhu Suśvietnaj arhanizacyi achovy zdaroŭja kolkaść ałkaholu, jaki spažyvajuć biełarusy, pastupova źnižajecca.
Toje paćviardžajuć i dadzienyja Biełstata. U 2015 hodzie biełarus vypivaŭ 9,05 litra, u 2014 — 13,94, u 2013 — 14,6.
Ciapier čytajuć
«Ja dumaŭ, mianie nie moža ničoha ździvić». Na fudkorcie ŭ minskim HC zrabili płatnyja stały4
Kamientary