Piać faktaŭ pra novaha staršyniu Biełteleradyjokampanii Ivana Ejsmanta
Hienadź Davydźka bolš nie dyrektar Biełteleradyjokampanii. Ciapier najbujniejšy miedyjny chołdynh krainy ŭznačalić 40-hadovy Ivan Ejsmant. Chto heta taki?
Muž pres-sakratarki Łukašenki
Hałoŭny fakt pra Ejsmanta, jaki zaciamniaje ŭsie astatnija — heta toje, što jon muž Natalli Ejsmant, pres-sakratarki Alaksandra Łukašenki. Pabralisia šlubam jany ŭ vieraśni 2010 hoda.
Na toj momant i Ivan, i Natalla pracavali viadučymi na BT. Natalla (u dziavoctvie Sialun, psieŭdanim na BT — Kirsanava) viała «Naviny rehijona», a Ivan — «Zonu Ch». Śviedkaj na viasielli była aktrysa Kupałaŭskaha Valancina Harcujeva. Piarścionki byli vykananyja z žoŭtaha i biełaha zołata z ałmaznym napyleńniem.
Heta byŭ typovy słužbovy raman. U 2006 hodzie Natalla pryjšła pracavać u pieradaču «Dziełavoje žyćcio», jakuju vioŭ Ivan. A praz dva hady para pačała sustrakacca. «U niejkim rodzie ja byŭ jaje nastaŭnikam», — raskazvaŭ Ivan.
U listapadzie 2014 hoda Alaksandr Łukašenka pryznačyŭ Natallu Ejsmant svaim pres-sakratarom. Z taho času jaje nazyvajuć adnoj z najbolš upłyvovych žančyn u kiraŭnictvie krainy.
Dziaciej u pary niama.
Siastra taksama na BT, brat — ahranom
Rodam Ivan Ejsmant ź miastečka Łuckaŭlany Hrodzienskaha rajona. Heta katalicki rehijon, usiaho za piać kiłamietraŭ ad polskaj miažy.
U siamji było troje dziaciej. Starejšy, Hienadź, staŭ hałoŭnym ahranomam u SVK imia Dzienščykava, a dačka Hanna — viadučaj spartyŭnych navin na BT.
Baćka Michaił Andrejevič pracavaŭ kiroŭcam u kałhasie. Hienadź uvieś čas prapadaŭ z baćkam na poli, tamu i vyrašyŭ stać ahranomam.
Maci Hanna Kanstancinaŭna kaža, što syn ź dziacinstva lubiŭ čytać haziety. Vyrazaŭ ź ich natatki pra sport, a asabliva radavaŭsia, kali bačyŭ niešta pra Dyjeha Maradonu.
Baćki Ejsmantaŭ, jakija razam užo 49 hadoŭ, kažuć, što starajucca nie prapuskać nivodnaha efiru, dzie pracujuć ich dzieci.
Vosiem hadoŭ prasłužyŭ u milicyi
Pa adukacyi Ivan Ejsmant nie žurnalist. Jon skončyŭ jurydyčny fakultet Akademii milicyi. Pracavaŭ u Hrodnie pa śpiecyjalnaści. Dasłužyŭsia da kapitana. Pra słužbu ŭ milicyi kaža: «Heta była dobraja škoła žyćcia». U hety čas pisaŭ jak pazaštatny aŭtar u spartyŭnuju hazietu «Presboł».
Na telebačańnie Ivan trapiŭ dastatkova vypadkova. U 2006 hodzie siastra Hanna, jakaja na toj momant užo pracavała na BT, zaprasiła Ivana pasprabavać siły ŭ kastynhu viadučych. Toj uzhadvaŭ, što na kastynhu byŭ apranuty ŭ pinžak Dzianisa Kurjana.
Pavodle aficyjnyj lehiendy, na telebačańni daviałosia ŭziać psieŭdanim, bo, maŭlaŭ, nie duža dobra, kali viadučy navinaŭ Ejsmant pieradaje słova viadučaj spartovych navin Ejsmant. U vyniku televiadučy staŭ Ivanam Michajłavym, što suhučna ź jahonym imiem pa baćku.
Maje miedal Franciška Skaryny
Na BT Ejsmant vioŭ samyja roznyja pieradačy: «Dziełavoje žyćcio», «Śfiera intaresaŭ», «Zona Ch», «Naviny», «Panarama», «Hałoŭny efir». Čym bolej času Ejsmant pracavaŭ, tym dalej pa słužbie jon prasoŭvaŭsia.
Uznačalvaŭ Ahienctva televizijnych navin, a ŭ mai 2017 staŭ namieśnikam staršyni Biełteleradyjokampanii. Ciapier Ejsmant zamianiaje na pasadzie svajho papiaredniaha kiraŭnika Davydźku.
Z pamiatnych intervju Ivan Ejsmant uspaminaje hutarku z rasijskim akcioram Michaiłam Bajarskim, jakoha atrymałasia rastapić aryhinalnymi pytańniami pra jahony kapialuš.
U studzieni 2014 hoda Ejsmant atrymaŭ z ruk Alaksandra Łukašenki miedal imia Franciška Skaryny. Tady ž miedal atrymali śpiavačka Viktoryja Aleška i ahladalnica «SB» Aelita Siulžyna.
Hałoŭnym svaim zachapleńniem Ivan Ejsmant nazyvaje futboł. Pryčym nie tolki hladzić, ale i starajecca sam nie zabyvać pra toje, jak hulać.
Zastupaŭsia za Łukašenku
Jak viadučy «Hałoŭnaha efiru», Ivan Ejsmant zapomniŭsia tym, što chvaliŭ hulniu Alaksandra Łukašenki na Kaladnym chakiejnym turniry ŭ 2016 hodzie.
«Z 2005 hoda hladžu matčy kamandy prezidenta i nikoli nie bačyŭ, kab supierniki rasstupalisia pierad prezidentam», — zapeŭnivaŭ Ejsmant.
«Nikoli nie pišy vialikija artykuły ab tym, u čym nie raźbiraješsia», — raiŭ viadučy BT žurnalistu tut.by Juryju Michaleviču, jaki paśmieŭ iranična vykazacca ab hulni Łukašenki.
***
Na telehram-kanał «Našaj Nivy» možna padpisacca tut.
Ciapier čytajuć
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary