U intervju francuzskamu časopisu Paris Match 82-hadovy Alen Dełon padvodzić vynik svajho žyćcia i karjery. Byłaja spadarožnica byłoha prezidenta, Valery Tryjerviejler, jakaja hutaryła z akcioram, nazvała hetuju sustreču «Ja, Dełon: intervju majho žyćcia», pieradaje rfi.fr.
Intervju źjaviłasia ŭ śpiecyjalnym vypusku, pryśviečanym 60-hodździu karjery vialikaha artysta. Uspomniŭšy pra svajo žyćcio, svaje roli, siabroŭ i siamju, Dełon tłumačyć svajo nieprymańnie siońniašniaj rečaisnaści: «Žyćcio mnie bolš ničoha nie prynosić. Ja ŭžo ŭsio bačyŭ, usio pieražyŭ. Ale hałoŭnaje, ja nienavidžu hetuju epochu, mianie ad jaje vanituje».
«Ja nienavidžu hetych ludziej. Usio falšyva, usio — padrobka. Pavahi bolš nie isnuje, nichto nie vykonvaje svaich abiacańniaŭ. Tolki hrošy majuć značeńnie. Kožny dzień, z ranicy da viečara, my tolki i čujem pra złačynstvy. Ja viedaju, što pakinu hety śviet biez škadavańnia», — kaža akcior.
Dełon trochi raspaviadaje pra niaŭdačy ŭ svaim asabistym žyćci, pra ciažkija ŭzajemaadnosiny ź siamjoj. Pra žančyn, jakich kachaŭ, i siabroŭ, jakich užo niama ŭ žyvych.
Pavodle jaho pryznańnia, asablivaje značeńnie ŭ žyćci akciora majuć sabaki. Kala piacidziesiaci jaho čatyrochnohich siabroŭ pachavana ŭ jaho sadzie ŭ pryharadzie Paryža, mienavita ź imi jon žadaje być pachavany i sam.
Na pytańnie ab miescy žančyn u svaim siońniašnim žyćci Dełon adkazvaje, što «tuju samuju» jašče nie znajšoŭ. «Ja b nie skazaŭ, što ŭ mianie brakuje kandydatak. U mianie ich kala dziasiatka, ale ni adna nie padychodzić na toje, kab ź joj razam pražyć reštu žyćcia. Ja moh by ažanicca z žančynaj, tolki kali b jana była hatovaja supravadžać mianie da kanca maich dzion», — tłumačyć Dełon.
Karjera akciora jašče daloka nie skončana: u intervju jon raspaviadaje pra apošni film, jaki zdymaje Patrys Lekont i ŭ jakim hałoŭnyja roli vykonvajuć Alen Dełon i Žuljet Binoš. Adnak zdymki pastajanna adkładajucca. Dełon taksama kaža, što chacieŭ by viarnucca na teatralnuju scenu.
Apošni film, u jakim Alen Dełon syhraŭ rolu Cezara, «Asteryks i Alimpijskija hulni» vyjšaŭ na ekrany ŭ 2008 hodzie. U teatry jon u apošni raz hraŭ u 2013 hodzie razam sa svajoj dačkoj Hannaj Dełon, vykonvajučy i na scenie rolu jaje baćki.
«Ja artyst, ale nie akcior, ja nie skančaŭ akciorskaj akademii», — nahadvaje Dełon, kažučy pra svaju prafiesiju. «Ja ničoha dla hetaha nie rabiŭ. U 14 hadoŭ ja kinuŭ škołu, a potym pajšoŭ u armiju. Ja z tych artystaŭ, jakimi byli Žan Habien, Lina Vientura abo Biert Łankaster — mocnyja asoby, jakich zdymali ŭ kino. I ja mahu zajavić, biez zališniaj ścipłaści, što mnie hetaja prafiesija ŭdałasia».
«Ja nikoli nie maryŭ pra takuju karjeru, jana sama saboj udałasia, — kaža Alen Dełon. — Ja nie naradziŭsia, kab stać Alenam Dełonam. Ja pavinien byŭ pamierci ŭžo daŭno. Ale heta nazyvajecca los».
Ciapier čytajuć
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie12
Kamientary