U jubilejnym kancercie zajhrajuć «Stary Olsa», Gods Tower, «Pałac», «Adarviroh», «Javaryna», Pawa i Trollwald.
«Kaladny fest» śviatkuje sioleta dziesiacihodździe! Za čas isnavańnia mierapryjemstva stała čakanaj padziejaj dla ŭsich amataraŭ biełaruskaj falkłornaj muzyki, jakaja, u svaju čarhu, była i zastajecca vizitnaj kartkaj našaj muzyčnaj kultury.
«Kaladny fest» — mierapryjemstva z asablivaj śviatočnaj atmaśfieraj, jakoje złučaje historyju i sučasnaść. Heta viartańnie tradycyj adnaho z samych śvietłych tradycyjnych biełaruskich śviataŭ.
Pieršy «Kaladny Fest» adbyŭsia ŭ 2007 hodzie ŭ kłubie «Step». Admietna, što i svajo 10-hodździe jon adśviatkuje na tym samym miescy, ale ŭžo ŭ kłubie Re:public (vuł. Prytyckaha, 62,).
«Naš fest źjaŭlajecca sprobaj biełaruskich muzykaŭ pakazać suviaź sučasnaści ź minułym, — raspaviali arhanizatary mierapryjemstva. — Na jubilejny fiestyval my źbirajem najbolš cikavyja hurty siaredniaviečnaj i fołk-muzyki. Ale ŭpieršyniu za 10 hadoŭ vystupić adzin z najlepšych fołk-mietał-hurtoŭ Gods Tower. Nas daŭno prasili ich zaprasić, i voś, naša ahulnaja mara ździejśnicca. Pryjemna radavać i cikavymi adkryćciami — takimi, jak małady hurt «Adarviroh». Taksama syhraje «Javaryna» — udzielnik pieršaha «Kaladnaha festu». I, naturalna, da nas dałučacca našy siabry i pastajannyja ŭdzielniki, a jak ža bieź ich — «Pałac» «Stary Olsa», Pawa, Trollwald. Viadučym festu budzie viadomy muzyka i dudar Źmicier Sasnoŭski. I, viadoma, buduć tancy, konkursy, śviatočnyja padarunki i šmat inšych cikavostak!»
Jubilejny «Kaladny fest» projdzie 25 śniežnia ŭ kłubie Re:Public.
Pačatak — 17:30.
Košt kvitkoŭ — 15-25 rub. (tancpoł), 30 rub (miesca za stolikam).
Kvitki ŭžo možna kupić praź internet.
Infalinija: 29 8517706, 44 5517706.
Kamientary