Źbityja na Dzień Voli: U aktrysy Svabodnaha teatra, mierkavana, pierałom kostki čerapa
Aktrysa Svabodnaha teatra Jana Rusakievič znachodzicca ŭ Balnicy chutkaj dapamohi. Padčas akcyi dziaŭčyna atrymała dubinkaj pa hałavie, miarkujecca, što ŭ jaje pierałom kostki čerapa.
«Ja spaźniłasia na akcyju i pryjechała nie tudy, dzie damaŭlalisia ź siabrami. Pakul čakała, zdymała ŭsio na telefon. Paśla z dvuch bakoŭ padbiehli amapaŭcy, jakija pačali chapać ludziej. Mianie schapili i paciahnuli ŭ aŭtazak», — raspaviała aktrysa žurnalistam «NN».
Ja im skazała, što ja nie chaču, kab jany mianie ciahnuli i praciahvała zdymać na videa. Paśla ja navat nie zrazumieła, što mianie ŭdaryli. Dalej pamiataju, što padyšli siabry i žurnalisty telekanała «Dožd́». Jany padniali mianie, ja ich abniała i pajšli ŭ bok fiłarmonii. Kali my dajšli, mnie patelefanavali siabry i paviedamili, što niekatorych ź ich užo zabrali. Ja adpraviłasia ŭ halereju «Ŭ», dzie mianie čakali znajomyja».
U halerei dziaŭčynie stała błaha i jana adpraviłasia na taksi dadomu. Pa darozie Janu zvanitavała i jana zhubiła prytomnaść. Razbudziŭ dziaŭčynu kiroŭca pa pryjeździe damoŭ.
Doma Janie stała horš i jana vyklikała chutkuju dapamohu. Dziaŭčynu špitalizavali i paśla tamahrafii zdymak pakazaŭ mahčymuju raskolinu kostki čerapa. Daktary vyrašyli zrabić paŭtorny zdymak dla paćvierdžańnia dyjahnazu.
«Spačatku jany chacieli adrazu vieźci mianie na apieracyju. Na tamahrafii jość niejkaja pałasa, ale mahčyma heta niejki šum. Siońnia doktar pryjšoŭ da mianie i skazaŭ, kab ja adpačyvała, a mnie buduć kałoć leki», — kaža Jana.
U balnicu chutkaj dapamohi pryjechała milicyja, jakija pačali fiksavać paboi. Sa słovaŭ Jany, pa fakcie źbićcia była zaviedziena kryminalnaja sprava.
Na dadzieny momant u dziaŭčyny strasieńnie hałaŭnoha mozhu, pravodzicca lačeńnie. Jana budzie znachodzicca ŭ balnicy da vyśviatleńnia kančatkovaha dyjahnazu i dalejšaha lačeńnia.
Jana Rusakievič skončyła Biełaruskuju akademiju mastactvaŭ. Peŭny čas hrała ŭ Nacyjanalnym teatry imia Ja.Kupały, zaraz źjaŭlajecca aktrysaj Svabodnaha teatra.
Kamientary