U Kleckim rajonie zabaranili prymać na pracu i zvalniać biez zhody rajvykankama

Kleckija pradpryjemstvy z 20 sakavika nie mohuć prymać i zvalniać rabotnikaŭ bieź piśmovaj zhody miascovych uładaŭ, paviedamlaje Tut.by. «Piersanalnaja adkaznaść za nievykanańnie dadzienaha daručeńnia ŭskładajecca na kiraŭnika arhanizacyi i śpiecyjalistaŭ kadravych słužbaŭ (až da zvalnieńnia)», — havorycca ŭ liście, jaki Klecki rajvykankam razasłaŭ pradpryjemstvam.

«Heta tyčycca ŭsich arhanizacyj kamunalnaj formy ŭłasnaści, raźmieščanych na terytoryi rajona. Heta źviazana z daručeńniem prezidenta pa pracaŭładkavańni ŭsich biespracoŭnych da 1 maja, — tłumačyć načalnik upraŭleńnia pa pracy, zaniataści i sacyjalnaj abaronie Kleckaha rajvykankama Ała Mieluk. — Uzhadnieńnie pryjomu i zvalnieńnia rabotnikaŭ pravodzicca časovaj kamisijaj pa pracaŭładkavańni hramadzian, jakija nie zaniatyja ŭ ekanomicy rajona».

Časovuju kamisiju stvaryli ŭ minułuju piatnicu, u jaje ŭvachodzić kala 10 čałaviek, «jakija mohuć paŭpłyvać na pracaŭładkavańnie». Pa słovach Ały Mieluk, kamisija apieratyŭna razhledzić zajavu na zvalnieńnie abo pryjom rabotnika.

Pavialičyć

«Kali čałaviek napisaŭ zajavu, to prablem niama, jaje vielmi chutka razhledziać. Ale my pavinny bačyć, pa jakich padstavach zvalniajucca, pa-pieršaje, a pa-druhoje, dzie ŭtvarajecca vakansija. Takim čynam, my bačym, chto zvalniajecca, dzie ŭtvarajecca pracoŭnaje miesca», — kaža śpiecyjalist.

Akramia taho, da 22 sakavika arhanizacyjam Kleckaha rajona treba pradstavić u rajvykankam infarmacyju ab vakansijach. Dalej padavać hetyja danyja treba budzie štomiesiac da 3 čysła.

Pa słovach Ały Mieluk, u Kleckim rajonie majuć namier vykanać daručeńnie Łukašenki i pracaŭładkavać usich biespracoŭnych da 1 traŭnia.

«Takoje daručeńnie, kab pracaŭładkavać usich, u tym liku i tych, chto nie źviartajecca ŭ słužby zaniataści. My źbirajemsia prapracavać z kožnym čałaviekam, jaki nie pracuje. Budziem vyjazdžać u sielskuju miascovaść, zaprašać kiraŭnikoŭ pradpryjemstvaŭ, hramadzian, jakija nie pracujuć, i vyznačać u kožnym indyvidualnym vypadku, kudy i kaho pracaŭładkavać, — adznačaje Ała Mieluk. — Budziem stvarać novyja pracoŭnyja miescy, pracaŭładkoŭvać na tyja miescy, jakija ciapier majucca, a taksama nakiroŭvać na apłatnyja hramadskija raboty».

U Kleckim rajvykankamie skłali śpisy tych, chto patencyjna maje patrebu ŭ pracaŭładkavańni, u jaho trapili kala 800 čałaviek. Ale śpis udakładniajecca.

Na 1 sakavika ŭzrovień zarehistravanaha biespracoŭja ŭ rajonie skłaŭ 0,8% ad ekanamična aktyŭnaha nasielnictva. U centry zaniataści byli zarehistravanyja 105 čałaviek. «Ale, viadoma, dysbałans pamiž popytam i prapanovaj rabočaj siły isnuje. Bolšaść vakansij dla kvalifikavanych śpiecyjalistaŭ, šmat daktaroŭ, vietdaktaroŭ nieabchodna. Tady jak častka biespracoŭnych zusim nie majuć jakoj-niebudź kvalifikacyi», — reziumuje śpiecyjalist.

Nahadajem, siońnia Alaksandr Łukašenka ŭ čas sustrečy ŭ Mahilovie z rabotnikami pradpryjemstvaŭ kampanii «Kronaspan» zabaraniŭ pravodzić skaračeńni na pradpryjemstvach i ŭ arhanizacyjach i zvalniać rabotnikaŭ biez uzhadnieńnia ź miascovymi orhanami ŭłady.

• 0
• 0
• 0
• 0
• 0
• 0
• 0
• 0