Zabryć u ahranomy!
Ahrarnaja narada na Bieraściejščynie nahadała mnie saviecki anekdot. «Što budzie, kali ŭstalavać kamunizm u Sachary?» — «Deficyt piasku». Piša ŭ svaim błohu Alaksandar Kłaskoŭski.
Ahrarnaja narada, što prajšła 25 lipienia na Bieraściejščynie, nahadała mnie saviecki anekdot. "Što budzie, kali ŭstalavać kamunizm u Sachary?" — "Deficyt piasku".
U nas ža, jak paviedamlaje ŭradavaje ahienctva, "składvajecca niaprostaja sytuacyja z kadravym zabieśpiačeńniem vioski ahraryjami…".
Čamu ahraryi nia chočuć u viosku — heta pytańnie kštałtu: čamu ryba nia choča žyć u vadzie?
Stolki hrošaj uvalili ŭ toje "adradžeńnie vioski" — a ź jaje rvuć kipci pry pieršaj mahčymaści.
Sa słoŭ kiraŭnika dziaržavy, na realizacyju prahramy adradžeńnia vioski ciaham 2005—2007 hadoŭ nakiravana blizu Br46 trłn., abo 125% da praduhledžanaha abjomu finansavańnia. Razam z tym, za try hady pryrost sielhaspradukcyi skłaŭ tolki 12,2% pry zadańni 21-27%. Niedadadziena kala 1,3 młn.t zbožža, stolki ž bulby, bolej za 60 tys.t ilnovałakna.
Karaciej, kolki ni śpiavaj dyfirambaŭ toj prahramie, niaŭzbrojenym vokam bačna, što dziaržaŭnaja napampoŭka ahrarnaj haliny hrašyma nie daje naležnaha efektu.
Darečy, chto patłumačyć, što ŭ hetym vypadku majecca na ŭvazie pad adradžeńniem? Da jakoj histaryčnaj rysy idzie ŭjaŭnaja chranałahičnaja adkrutka? Kali vioska kvitnieła i dychała volna? Mo' pry kałhasach? Ci za časami pryhonu?
Zrešty, što kałhas, što pryhon — roźnica nievialikaja. I ŭłada, zdajecca, navažyłasia adnavić elemienty pryhonu. Inačaj jak patłumačyć słovy aficyjnaha lidera: "Pastupiŭ u VNU — viedaŭ, kudy išoŭ. I prosta adpracavać i niekudy pajści nia budzie dazvolena. My heta jurydyčna zamacujem".
Taksama było zajaŭlena, što "małady śpiecyjalist, nakiravany pavodle raźmierkavańnia, biez dazvołu staršyni rajonnaha abo abłasnoha vykankamu nia zmoža pierajści na inšaje miesca pracy".
Voś tabie, babula, i Jurjeŭ dzień!
Cikava, a kali napužanaja moładź uvohule nie zachoča iści ŭ sielhasVNU? Rekrutavać daviadziecca, musić. Zabryvać iłby — i na 25 hadoŭ. Ci ŭstaloŭvać usieahulnuju ahrarnuju pavinnaść. I heta my ŭžo prachodzili za savieckim časam, kali prafesuru hnali na bazy pierabirać hniłuju harodninu.
Zaklučnymi akordami narady stali zahady, kali pačynać i kali skančać žnivo. Režym ručnoha kiravańnia sielskaj haspadarkaj nikudy nie padzieŭsia.
Što ž da naroščvańnia ekspartu praduktaŭ na tle "hałodnych buntaŭ pa ŭsim śviecie", to niezaležnyja ekanamisty kažuć, što treba jašče razabracca, ci jość taja vyhada. Bo kali ŭličyć, kolki datacyj idzie našamu ahrarnamu sektaru, dyk ci nie atrymlivajecca, što my ŭ rešcie rešt subsidujem zamiežnaha spažyŭca?
Sa słoŭ Leanida Złotnikava, vyvaz ŭ Rasieju jałavičyny, ptuški, jajek, masła ŭvohule stratny. Sabiekošt kilahramu jałavičyny, naprykład, dziesiać tysiač rubloŭ, a rasiejcam pradajem pa šeść. "To bok, biełaruskaja sielskaja haspadarka zastajecca nieefektyŭnaj", — kaža ekspert.
Ciapier čytajuć
«Jon kazaŭ, što zołata z saboj nie zabiareš, lepiej zrabić niešta dla inšych». Dačka biznesmiena Kalina raskazała, jak razam z bratam čakaje jaho z kałonii
Kamientary