Tramp zhadaŭ 1300 biełaruskich palitviaźniaŭ. Adkul takaja ličba i kolki ich nasamreč?

«Abmiarkoŭvajem pytańnie ab vyzvaleńni jašče 1300 źniavolenych», — takija słovy prahučali 15 žniŭnia ŭ publikacyi Donalda Trampa, dzie toj raskazaŭ pra sazvon z Alaksandram Łukašenkam. Paźniej Tramp jašče raz nazvaŭ hetuju ličbu ŭ svajoj inšaj publikacyi: «Spadziajusia, 1300 čałaviek chutka vyjduć na volu!»

Isnujuć dva vialikija śpisy biełaruskich palitviaźniaŭ.

Bolš viadomy toj, što viadzie «Viasna». U im pieraličvajucca 1183 palitviaźni. Pry hetym, jak patłumačyli «Našaj Nivie» pravaabaroncy «Viasny», im viadoma jašče pra dziasiatki ludziej, jakija znachodziacca za kratami pa palityčnych matyvach.

Ale jość i druhi śpis palitviaźniaŭ, ad inicyjatyvy Dissidentby. U im naličvajucca 1322 palitviaźni. I mienavita hety lik bližejšy da taho, jaki nazvaŭ Donald Tramp.

Čamu pamiž śpisami jość roźnica? Sprava ŭ roznych padychodach da fiksacyi ludziej i ŭvohule da vyznačeńnia palitźniavolenaha.

Pradstaŭnica inicyjatyvy Dissidentby Maryna Kasinierava pryvodzić prykład:

«Kali była zatrymanaja hrupa Alinieviča, my ich adrazu pryznali palitźniavolenymi, tamu što była infarmacyja pra ich katavańni i brutalnaje zatrymańnie. Pry hetym užo było viadoma publična, za jakija akcyi ich zatrymali».

Havorka pra anarchistaŭ Ihara Alinieviča, Dźmitryja Duboŭskaha, Dźmitryja Rezanoviča i Siarhieja Ramanava, jakija ŭ śniežni 2021-ha atrymali prysudy ad 18 da 20 hadoŭ kałonii pa abvinavačvańniach u padpale słužbovych aŭtamabilaŭ, budynku DAI i dziaržkamiteta ekśpiertyz u Homielskaj vobłaści. Jany trapili ŭ śpis palitviaźniaŭ «Viasny» tolki paśla taho, jak byli abvieščanyja prysudy.

Maryna adsyłaje da zajavy, jakuju pryniali ŭ 2021 hodzie niekatoryja biełaruskija pravaabaroncy, pieršyja ŭ śpisie padpisantaŭ — Dissidentby. U hetaj zajavie pravaabaroncy zaklikajuć karystacca pryncypam prezumpcyi nievinavataści, kali vyrašajuć, ci vyznavać čałavieka palitviaźniem. 

To-bok u tych vypadkach, kali pravaabaroncam «Viasny» moža nie chapić infarmacyi, kab pryznać biełarusa palitviaźniem, ci kali znojducca inšyja pieraškody dla takoha pryznańnia, Dissidentby chutčej pahodzicca vyznać čałavieka palitźniavolenym i nie budzie čakać, kali palityčnaja sutnaść spravy stanie bačnaja pa vynikach suda.

Zrešty, u vyniku ŭsie patencyjna «sprečnyja» palitviaźni — i zhadanyja vyšej anarchisty, i hrupa Aŭtuchoviča, i rejkavyja partyzany — trapili ŭ abodva śpisy, i «Viasny», i Dissidentby. Za apošni čas pryncypovych razychodžańniach u padychodach nie zastałosia.

Adnak jość inšyja pryčyny, čamu śpisy adroźnivajucca. Havorka, naprykład, pra ludziej, kamu prysudzili chimiju z nakiravańniem. Pravaabaroncy «Viasny» paśla suda časova vydalajuć takich ludziej sa śpisu palitviaźniaŭ — faktyčna čałaviek da adjezdu na chimiju znachodzicca doma, i było b niełahična patrabavać jaho nieadkładnaha vyzvaleńnia. A voś kali čałaviek dajazdžaje da chimii, to jaho dadajuć u śpis palitviaźniaŭ znoŭ.

U Dissidentby, tłumačyć Maryna Kasinierava, inšy padychod. Časta niama mahčymaści adsačyć, ci adbyvaje čałaviek na samoj spravie tuju chimiju abo źjechaŭ za miažu. Kali pravaabaroncy daviedvajucca, što čałaviek nie ŭ Biełarusi, jany źmianiajuć jaho status na «vymušanuju emihracyju». Takaja sistema ŭ tym liku dapamahaje nikoha nie zhubić.

Aproč taho, u śpisach Dissidentby jość i častkova ananimizavanyja kiejsy, dzie paznačajecca, naprykład, tolki imia pieršyja litary proźvišča i imia pa baćku, čałavieka, jaki tolki-tolki trapiŭ u SIZA.

Maryna Kasinierava zapeŭnivaje, što heta niepubličnyja historyi, ale pravaabaroncy Dissidentby majuć naležnyja danyja pra hetych ludziej.

U śpisie «Viasny» takich palitviaźniaŭ niama, bo niemahčyma patrabavać vyzvaleńnia ŭmoŭnaj «Lizaviety Ł.» — chto heta takaja? A kali pravaabaroncy paličać, što nazvać imia ŭžo možna — naprykład, prysud byŭ vyniesieny, to dadajuć jaje ŭ palitviaźni z usioj ankietnaj infarmacyjaj.

Važny momant: i ŭ tym, i ŭ tym śpisie jość dziasiatki, a moža, i sotni čałaviek, jakija nasamreč užo doma. Kali palitviazień vyzvaliŭsia pa terminie, to možna chacia b prykładna vyznačyć, kali jon pavinien vyjści na svabodu. U vypadku z chvalami pamiłavańniaŭ da pravaabaroncaŭ dachodzić tolki častka infarmacyi.

A kolki ž na samoj spravie palitviaźniaŭ u Biełarusi? Pravaabaronca Leanid Sudalenka miarkuje, što vyśvietlić heta na siońnia niemahčyma:

«Liču, što dakładnuju kolkaść palitviaźniaŭ na siońnia nie viedaje nichto — ni «Viasna», ni Dissidentby, ni inšyja pravaabarončyja inicyjatyvy. Jość siemji palitviaźniaŭ, jakija nie chočuć ahučvać fakt zatrymańnia ich blizkich. Kali ich sadziać u turmu, rodnyja chavajuć heta i nie źviartajucca da pravaabaroncaŭ, kab nie naškodzić.

Dakładnuju kolkaść palitviaźniaŭ my daviedajemsia potym, kali represii spyniacca i kožny z tych, chto padpaŭ pad represii, u tym liku i znachodziŭsia ŭ turmach, pažadaje raspavieści hramadstvu pra svaje kiejsy».

Faktar strachu nasamreč isnuje, ale, na dumku Maryny Kasinieravaj, ličba ŭ 1318 palitviaźniaŭ usio ž blizkaja da realnaści. Adzinaja mahčymaja składanaść — infarmacyja pra źniavolenych, jakija čakajuć suda ŭ SIZA, asabliva pa artykule 342 (za ŭdzieł u akcyjach pratestu), bo heta vialiki kanviejer, za jakim nie zaŭždy prosta sačyć.

• 0
• 0
• 0
• 0
• 0
• 6
• 0
• 1