Što ciapier z 11‑hadovaj školnicaj, jakuju ŭ Homieli pakusali biazdomnyja sabaki
Dziaŭčynka viartałasia dadomu, kali da jaje vybiehli čatyry sabaki. Ukusy ŭ jaje byli pa ŭsim ciele.
Vypadak u Homieli, kali sabaki pakusali 11‑hadovuju dziaŭčynku, staŭ rezanansnym. Što ciapier sa školnicaj, raskazali na STB.
Usio zdaryłasia 8 maja. Dziaŭčynka Lida hulała ź siabroŭkami, pryblizna a čaćviortaj hadzinie dnia raźvitałasia ź imi i pajšła dadomu. Joj treba było prajści pa ściežcy ŭ lesapałasie. Tam dziaŭčynka ŭbačyła čatyroch vialikich sabak i spałochałasia. U hety momant nikoha pobač nie było. Lida spatyknułasia i ŭpała, a sabaki nalacieli na jaje i nie dali padniacca. Dziaŭčynka ŭtknułasia ŭ ziamlu tvaram i zakryła hałavu rukami.
Ukusy ŭ jaje byli pa ŭsim ciele. Acaleŭ tolki tvar.
Sabak tady adahnaŭ miascovy matacyklist Alaksandr Ravianok. Jon raskazvaje STB:
«Adzin ščoŭkaŭ zubami, jana sprabavała admachnucca nahoj. Druhi ŭ hety momant za vyciahnutuju nahu kusaŭ i adbiahaŭ. Nichto ŭ jaje mocna nie ŭčapiŭsia. Sabaki dla 11‑hadovaha dziciaci byli davoli bujnymi. Niedzie 35—40 santymietraŭ u karku. Sabaki sami adstupili, jak tolki ja źjaviŭsia, ale ŭ dalejšym pasprabavali nablizicca. Atrymaŭšy aplavuchu, adzin zaviščaŭ, druhi za im u les adrazu ž. Bolš ja ich nie bačyŭ».
Lidu dastavili ŭ balnicu. Dźvie hadziny jaje apieryravali. Ciapier školnica idzie na papraŭku, jaje ŭžo pieraviali ŭ zvyčajnuju traŭmatałohiju.
«Prahnoz u jaje spryjalny. Ja dumaju, što ŭ chutkim časie, paśla zažyŭleńnia ran i źniaćcia našych švoŭ, jana vierniecca da svajho paŭnavartasnaha žyćcia», — kaža Alaksiej Prysłopski, traŭmatołah-artapied Homielskaj abłasnoj dziciačaj kliničnaj balnicy.
Baćka Lidy kaža, što ŭ jaje časam prapadaje pamiać. «Jana kaža, što ja z vami razmaŭlaju i tut ža zabyvaju. Ja nie pamiataju, što ŭčora było. To bok pamiać źnikaje. Potym jak by jana ŭspaminaje».
Paśla rezanansnaha vypadku słužby adłoŭlivajuć u Homieli ŭsich biazdomnych sabak i adpraŭlajuć u časovyja valjery.
Čamu sabaki tady napali na dziaŭčynku? Hałoŭnaja viersija — žyvioły abaraniali svaju terytoryju. Šałaš i budku ŭ lesapałasie znajšoŭ mužčyna, jaki vyratavaŭ školnicu. Vierahodna, tut žyvuć biazdomnyja, jakija faktyčna vyhadavali i pryručyli tych sabak.
Kamunalnyja słužby naviali paradak u lesapałasie, a biazdomnych pieradali milicyi.
Ciapier čytajuć
«Hałoŭnaje nie zabyvać padzaradžać nie tolki telefon, ale i siabie samoha». Jak ukrainski vajskoviec žyvie z dvuma elektrastymulatarami. I što ŭ jaho z seksam?11
«Hałoŭnaje nie zabyvać padzaradžać nie tolki telefon, ale i siabie samoha». Jak ukrainski vajskoviec žyvie z dvuma elektrastymulatarami. I što ŭ jaho z seksam?1
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje99
Kamientary