Piarcoŭ paskardziŭsia, što paśla niekatorych prapahandysckich lekcyj ludzi pierastajuć padtrymlivać uładu
Pieršy namieśnik kiraŭnika administracyi Łukašenki źbirajecca aceńvać efiektyŭnaść pracy ideołahaŭ.
Hałoŭny ideołah krainy Uładzimir Piarcoŭ paabiacaŭ vymierać efiektyŭnaść pracy ideołahaŭ.
Pieršy namieśnik kiraŭnika administracyi Łukašenki raskazaŭ, što ŭžo raspracavanyja kryteryi acenki, piša «SB».
«Nami raspracavanyja peŭnyja repiernyja punkty, tak zvanyja klučavyja pakazčyki efiektyŭnaści, jakija my budziem abkatvać da kanca hoda ŭ ekśpierymientalnym režymie. A z nastupnaha hoda jany stanuć pastajannymi pakazčykami, pa jakich my budziem aceńvać pracu ideałahičnaj viertykali», — napałochaŭ ideołahaŭ Piarcoŭ.
Jon panarakaŭ, što prapahandysty ŭ rehijonach pracujuć pa nakatanaj, biez ahieńčyka i kreatyvu. I adpraviŭ ideołahaŭ u sacyjalnyja sietki.
«Jość žadańnie pracavać užo pa nakatanych rejkach, čaho rabić nielha. Ideołah pavinien zastavacca hienierataram i pravadnikom sensaŭ, piedahoham i cudoŭnym lektaram, jon pavinien umieć spałučać u sabie ŭsie hetyja jakaści. Akramia taho, ideołah pavinien umieć pracavać u sacyjalnych sietkach i miesiendžarach, razumiejučy ich ałharytmy, pavinien umieć abjadnać vakoł siabie ideałahičny aktyŭ adnadumcaŭ — nie tolki členaŭ palityčnych partyj i hramadskich abjadnańniaŭ, ale ŭsich, chto maje ščyryja pačućci lubovi da našaj krainy», — zajaviŭ Piercaŭ.
Hałoŭny ideołah paskardziŭsia na nieefiektyŭnaść prapahandysckich lekcyj na pradpryjemstvach. Na jaho dumku, lektary časam pracujuć niajakasna, i ŭ vyniku lekcyi majuć advarotny efiekt. To-bok ludzi, pasłuchaŭšy praŭładnaha aratara, pierastajuć hetuju ŭładu padtrymlivać.
«Nieabchodna vymierać efiektyŭnaść padobnych sustreč. Aŭdytoryi roznyja, ale i lektary jość roznyja. Čałaviek moža być prafiesijanałam, ale słabym arataram. Na žal, takija sustrečy nie pryvodziać da pazityŭnych vynikaŭ, navat naadvarot», — skazaŭ namieśnik kiraŭnika administracyi.
Vymiarać efiektyŭnaść prapahandystaŭ Piarcoŭ prapanavaŭ pa kolkaści padpisčykaŭ i hledačoŭ u sacyjalnych sietkach.
«My nabližajemsia da vymiareńnia internet-aŭdytoryi, unikalnych karystalnikaŭ sacyjalnych sietak i miesiendžaraŭ, što taksama važna. Hetyja srodki masavaj kamunikacyi ŭ mnohim upłyvajuć na śvietapohlad ludziej. Pa-raniejšamu buduć prymianiacca sacyjalnyja apytańni, sacyjalnyja daśledavańni — jak tvaram da tvaru, tak i telefonnyja abzvony, srodki elektronnaha kantrolu, jakija pakazvajuć ličbavuju praŭdu», — paabiacaŭ Piercaŭ.
Namieśnik kiraŭnika administracyi Łukašenki zapatrabavaŭ uzmacnić prapahandu ŭ pryvatnych arhanizacyjach. Jon zapatrabavaŭ, kab u pryvatnym siektary stvaralisia nie tolki jačejki praŭładnych prafsajuzaŭ, ale i dazvolenych palityčnych partyj.
Hałoŭny ideołah Biełarusi znajšoŭ u krainie «psieŭdapatryjatyčnyja jačejki» i zaklikaŭ da zmahańnia ź imi «adzinym bajavym kułakom»
Ejsmant, Radźkoŭ, Piarcoŭ i Karlukievič napisali knihu pra Łukašenku «Naš prezident»
Piarcoŭ: My karnych mieraŭ u dačynieńni da inšych resursaŭ nie pravodzim
«Što heta za maciuki?» Łukašenka spytaŭ u Piarcova, što za fakultet humanitarystyki — toj skazaŭ, što heta «łokciami šturchacca»
«Niekatorym ludziam varta źniać ružovyja akulary». Lavončyk — pra Mielnikavu, uciečku ŭ «Bajchełp», biełyja palito i hrošy na 1300 palitviaźniaŭ10
Kamientary