«Nie nyjcie! Vaźmicie niejkuju rabotu na siabie». Franak Viačorka žorstka adkazaŭ Knyroviču
Alaksandr Knyrovič abvinavaciŭ demsiły ŭ imitacyi, adsutnaści dyskusij i «kakanizacyi» vakoł Śviatłany Cichanoŭskaj, na što atrymaŭ adłup ad Franaka Viačorki.
U kamientary pad dopisam Knyroviča na staroncy ŭ fejsbuku daradca Cichanoŭskaj zaklikaŭ taho «nie nyć» i samastojna brać adkaznaść za pracu.
«Darahi Alaksandr, u vas niejmavierny resurs, vialikaja hrupa padtrymki, vaša frakcyja kaliści była vielmi aktyŭnaja.
Vy źbiralisia i dyjasparu jadnać, i zapuskać miechanizmy samafinansavańnia, i zrabili takuju jarkuju vybarčuju kampaniju! Ale ciapier vy marnujecie ŭvieś svoj resurs na ŭnutranyja razborki i nie hienierujecie nijakich novych idej. Amal usia vaša publičnaja dziejnaść ciapier zvodzicca da taho, kab pavajavać z Łatuškam ci Cichanoŭskaj, kahości padkałoć, kahości adpravić u adstaŭku.
Jašče abiacali skinuć tyja znakamityja 40 pytańniaŭ/idej ad Prakopjeva, tak my i nie dačakalisia. Nie nyjcie. Prosta vaźmicie niejkuju rabotu na siabie», — napisaŭ Viačorka.
Jon taksama nahadaŭ, što ŭ Knyroviča jość ułasnyja resursy, kab niešta rabić, ale jon imi nie karystajecca naležnym čynam:
«Navat u vas asabista jość infarmacyjnyja kanały (raźvityja za košt taho ž samaha zamiežnaha finansavańnia), vykarystoŭvajcie ich dla hramadskaj mabilizacyi, dla aśviety, dla abjadnańnia prychilnikaŭ pieramien. Pazbaŭlajciesia hetaha paternalizmu, što voś Śviatłana pavinna ŭsio vyrašyć za vas».
Adkazvajučy na inšyja pretenzii Knyroviča, ahučanyja ŭ kamientarach pad dopisam, Franak Viačorka ŭdakładniŭ, što marafon salidarnaści arhanizoŭvali biełaruskija žurnalisty, ale jany sami admovilisia ad hetaj idei. Zamiest hetaha razam z narodnymi pasolstvami praviali estafietu salidarnaści.
Što da finansavańnia pajezdak, to daradca Cichanoŭskaj adznačyŭ, što ŭ ich niama vialikich srodkaŭ, tamu zvyčajna darohu apłačvaje zaprašajučy bok (naprykład, univiersitet u ZŠA), a biełaruskija biźniesmieny, u tym liku Prakopjeŭ, robiać tolki nievialikija achviaravańni, choć jany ŭdziačnyja i za heta.
«My ekanomim kožny cent», — zajaviŭ Viačorka.
Kamientary