Biełarus raptoŭna i biez daj pryčyny źnik u 2006 hodzie, a praz 19 hadoŭ znajšoŭsia ŭ vioscy pad Smalenskam
U vieraśni 2006 hoda ŭ minskuju milicyju źviarnułasia žančyna: jaje 43-hadovy muž pajšoŭ na pracu i nie viarnuŭsia. Siarhiej byŭ dastatkova zvyčajnym siamiejnym čałaviekam: dobra zarablaŭ, nie złoŭžyvaŭ ałkaholem, tamu jaho źniknieńnie vyhladała vielmi dziŭnym. Ale jašče bolš dziŭnym było toje, jak jahonyja ślady adšukalisia praz 19 hadoŭ, piša hazieta «Na stražie».
Adrazu paśla źniknieńnia mužčyny ŭ milicyi pačali rasśledavańnie ź siamji. Vyhladała, adnak, što adnosiny z žonkaj byli zvyčajnyja: čas ad času svarylisia, ale chutka mirylisia. Doma Siarhieja čakali taksama 14-hadovaja dačka i 13-hadovy syn, jaki byŭ asabliva blizki z baćkam.
Mienavita syn bačyŭ baćku apošnim: paśla viartańnia sa škoły jon pačuŭ, jak Siarhiej razmaŭlaŭ praz mabilny telefon, a paśla ŭziaŭ torbu i pajšoŭ, nie raźvitaŭšysia.
Dalej rasśledavańnie vyśvietliła, što ŭ siamji časam usio ž uźnikali skandały. Apošni byŭ jakraz napiaredadni źniknieńnia. Žonka śćviardžała, što asablivaj pryčyny dla hetaha nie było, ale, chutčej za ŭsio, svarka była źviazanaja z hrašovymi prablemami Siarhieja. Jon zachaplaŭsia azartnymi hulniami i časta traciŭ vialikija sumy ŭ kazino. U dzień źniknieńnia jon prajhraŭ nie mienš za $3000.
Siarhiej dobra zarablaŭ jak adzin z kiraŭnikoŭ firmy pa pastaŭcy hruzavikoŭ i zapčastak, ale apošnim časam siamja amal nie atrymlivała ad jaho hrošaj. U dadatak da finansavych prablem jon zalacaŭsia da maładoj dziaŭčyny, što taksama mahło vyklikać prablemy ŭ siamiejnym žyćci.
Siarod mahčymych pryčyn źniknieńnia razhladalisia i kalehi pa biznesie: u kampanii była «čornaja kasa», ź jakoj u pačatku vieraśnia źnikli kala $10 000. Siarhieja apošni raz bačyli ŭ ofisie, a paśla jon jak by «rastvaryŭsia». Usie viersii, u tym liku z udziełam kaleh, nie dali vyniku. U vyniku mužčyna byŭ abvieščany ŭ nacyjanalny i mižnarodny vyšuk.
Padčas vyšuku zasiarodzili ŭvahu i na mašynie Siarhieja — biełym VAZ-2104. Jaje paźniej znajšli, ale ŭžo biez karysnaj infarmacyi. Nie paćvierdziłasia viersija, što mužčyna pajechaŭ da svajački ŭ Sankt-Pieciarburh. U kancy 2010-ch siamji paviedamili pra supadzieńnie prykmiet ź niejkim ciełam u Viciebsku, ale hienietyčnaja pravierka pakazała, što heta nie jon.
Pry hetym ni kvitkoŭ, ni źmieny dakumientaŭ, ni źniaćcia hrošaj z kartak, ni pierarehistracyj nieruchomaści — ničoha hetaha, za što možna było b začapicca, nie było. Urešcie ŭ 2011 hodzie siamja aficyjna pryznała Siarhieja pamierłym i praciahnuła žyćcio bieź jaho.
A ŭ mai 2025 hoda ŭ adnu sa smalenskich balnic dastavili pažyłoha mužčynu z sardečnym prystupam. Razam ź im była žančyna, jakaja nazyvała jaho Siarhiejem. Pravierka dakumientaŭ i baza Interpała paćvierdzili: heta toj samy źnikły čałaviek. Amal 20 hadoŭ tamu jon atabaryŭsia ŭ addalenaj vioscy ŭ Smalenskaj vobłaści, stvaryŭ novuju siamju i ŭvieś čas žyŭ vielmi zamkniona.
Sa staroj siamjoj mužčyna pakul sustrecca nie hatovy.
Kamientary
Stamiŭsia jon karmić nieŭdziačnuju tałaku, kinuŭ usio majno im i cicha zvaliŭ pamirać tudy, dzie jaho zrazumieli. Adčapiciesia ad mužyka, skvapnyja fematerarystki!