Na pieršym pasiadžeńni suda ŭ Kiembrydžy nad znakamitym savieckim dysidentam Uładzimiram Bukoŭskim vyśvietliłasia, što bolšaja častka fajłaŭ, jakija źmiaščajuć dziciačuju parnahrafiju i vyjaŭlenych na jaho kampjutary, nikoli nie prajhravałasia ŭ videapłejery i nie adčyniałasia ŭ prykładańniach dla prahladu fota.
Ekśpiert palicyi, jaki vystupiŭ u paniadziełak u sudzie, zajaviŭ, što z tysiač znojdzienych fajłaŭ tolki zusim nievialikaja častka prahladałasia ŭ adpaviednych prahramach — heta značyć, adnosna pieravažnaj bolšaści fajłaŭ u palicyi niama fizičnych dokazaŭ prahladu.
Prakuratura abvinavačvaje 73-hadovaha Uładzimira Bukoŭskaha ŭ vyrabie (pad hetym słovam majecca na ŭvazie spampoŭvańnie ź internetu) i zachoŭvańni fatahrafij i videa z adlustravanymi na ich dziećmi ŭ nieprystojnych scenach. Jon rašuča abviarhaje abvinavačvańni.
U sud Bukoŭskaha, jakomu 30 śniežnia spoŭnicca 74 hady, pamočnik pryvioz u invalidnym vazku. Letaś Bukoŭski pieranios ciažkuju apieracyju, paśla jakoj jaho ŭvodzili ŭ štučnuju komu.
Padčas pasiedžańnia advakat Bukoŭskaha Frensis Fitchiban skazaŭ sudździ, što jaho padabaronny, mahčyma, padčas słuchańniaŭ budzie prasić ab dadatkovych pierapynkach, bo jon stamlajecca i hublaje kancentracyju.
Pa płanie słuchańni pa spravie Bukoŭskaha ŭ sudzie Kiembrydža buduć iści kožny dzień na hetym tydni. Uładzimir Bukoŭski miarkuje, što prysiažnyja mohuć vynieści vierdykt ŭžo ŭ kancy tydnia.
Tłumačeńni Bukoŭskaha
Palicyja pryjšła da Bukoŭskaha ŭ jaho dom u Kiembrydžy ŭ kastryčniku 2014 hoda, paśla taho jak atrymała infarmacyju, što z kampjutara, jaki znachodzicca pa hetym adrasie, zachodzili na sajty dziciačaha porna.
Na kamjutary i inšych elektronnych pryładach ŭ domie Bukoŭskaha byli vyjaŭlenyja tysiačy fota i videa ź niepaŭnaletnimi.
Abvinavaŭca Uił Karter, apisvajučy ŭ paniadziełak kanvu spravy prysiažnym, nahadaŭ i ab tłumačeńniach Bukoŭskaha, jakija jon tady daŭ u palicyi.
Pavodle hetych tłumačeńniaŭ u pierakazie prakurora, Bukoŭski šmat hadoŭ tamu zacikaviŭsia prablemaj abmiežavańnia svabody internetu, u tym liku ŭ suviazi z raspaŭsiudžvańniem dziciačaj parnahrafii, i ŭ ramkach daśledavańnia hetaha pytańnia vyvučaŭ dastupnaść i źmiest sajtaŭ ź dziciačym porna.
U Bukoŭskaha i jaho advakataŭ jość i inšyja piarečańni i apraŭdańni, i pra niekatoryja ź ich Bukoŭski ŭ paniadziełak raspavioŭ Bi-bi-si, ale hetyja dovady nie mohuć być apublikavanyja da taho, jak ich pačujuć u sudzie prysiažnyja.
Uładzimir Bukoŭski nazyvaŭ hetuju kryminalnuju spravu suprać jaho «kafkijanskaj». Jon padaŭ suprać Karaleŭskaj prakuratury pazoŭ ab paklopie, ale Vysoki sud u Łondanie adchiliŭ pazoŭ.
Uładzimir Bukoŭski byŭ adnym z zasnavalnikaŭ dysidenckaha ruchu ŭ SSSR. Jon pravioŭ 12 hadoŭ u źniavoleńni i na prymusovym lačeńni. U 1976 hodu savieckija ŭłady abmianiali Bukoŭskaha na lidara čylijskich kamunistaŭ Łuisa Karvałana.
«Sojevyja ekstremisty pavinny adpracavać misku kłubnic». Skardziŭsia na ŭmovy pracy ŭ KDB, a ciapier uciuchvaje treninhi siłavikam — chto taki Anton Šabunievič1919
Kamientary