Zatrymany Juryj Paŭłaviec pisaŭ na «Rehnumie» pad psieŭdanimam Mikałaj Radaŭ pra toje, što ŭ Biełarusi chočuć vajavać z Rasijaj
Stanoviacca viadomymi novyja padrabiaznaści zatrymańnia historyka, dacenta BDUIRa Juryja Paŭłaŭca. 37-hadovaha ŭradženca Žodzina zatrymali ranicaj 6 śniežnia. Toje, što jon znachodzicca ŭ SIZA, dla rasijskich ŚMI paćvierdziła maci Paŭłaŭca.
8 śniežnia stała viadoma, što ŭ toj samy dzień u Breście byŭ zatrymany jašče adzin adept «ruskaha śvietu» Dźmitryj Alikin, jakija chavaŭsia na sajcie Regnum.ru pad psieŭdanimam «Ała Broń».
Pa ŭsim vyhladaje, što Juryj Paŭłaviec taksama da apošniaha času pisaŭ na Rehnum pad psieŭdanimam «Mikałaj Radaŭ». Radaŭ, Broń i šef-redaktar Rehnuma Juryj Barančyk byli asnoŭnymi aŭtarami vydańnia pa Biełarusi.
Niekatoryja sajty drukujuć źlituju ŭ internet infarmacyju ab Juryi Paŭłaŭcu i Dźmitryju Alikinu, ich pierapisku z rasijskimi vydańniami. Toje, što Paŭłaviec i «Radaŭ» — heta adzin i toj ža čałaviek śviedčać chacia b niekatoryja publikacyi, jakija publicyst tolki krychu papraŭlaŭ dla roznych vydańniaŭ. Naprykład, hladzicie tut i tut.
Letam Mikałaj Radaŭ źmiaściŭ manipulatyŭny artykuł «Čamu u Biełarusi chočuć vajavać z Rasijaj?» Sama nazva niasie ŭ sabie destruktyŭ. Mabyć, va ŭsioj krainie nie znojdziecca nivodnaha čałavieka, jaki b chacieŭ vajny z Rasijaj.
Radaŭ abvinavačvaŭ biełaruskija ŭłady ŭ tym, što jany paturajuć raspalvańniu rusafobii, asabliva dastavałasia palitołaham Juryju Caryku i Arsieniju Sivickamu i ich dakładu «Biełaruś u kantekście supraćstajańnia Rasija—NATA: Pahrozy i vykliki dla suvierenitetu, niezaležnaści i nacyjanalnaj biaśpieki. Stratehičnyja vysnovy i rekamiendacyi».
«Vyšejzhadany dakład, jak i šerah padobnych jamu, pavinien pastupova, kropla za kroplaj, farmiravać u masavaj śviadomaści prostych hramadzian novaje pačućcio strachu, u asnovie jakoha zakładziena ideja ab mahčymaści vajennych dziejańniaŭ na terytoryi respubliki», — pisaŭ Radaŭ.
Było i mnostva inšych publikacyj, dzie minski historyk pisaŭ, što biełaruskija ŭłady pavodziać siabie pa ŭkrainskim scenary. Biełaruś ža nazyvałasia ŭ jaho publikacyjach «limitrofam». Heta taki termin, jaki byŭ uviedzieny ŭ abarot u časy SSSR u dačynieńni dziaržaŭ, što ŭtvarylisia na ŭskrainach Rasijskaj impieryi. U siońniašniaj publicystycy termin vykarystoŭvajecca z prynižalnym adcieńniem.
Astatnija publikacyi možna pahladzieć pa spasyłcy.
Na sajcie Lenta.ru jaho publikacyi vychodzili pad psieŭdanimam Pavieł Juryncaŭ.
My patelefanavali ŭ Maskvu šef-redaktaru «Rehnuma» Juryju Barančyku z prośbaj pra kamientar. «Ja ŭstrymajusia, vy vielmi ahresiŭna pišacie», — skazaŭ jon.
Niekatoryja ludzi, jakija pamiatajuć Juryja Paŭłaŭca jašče pa vučobie na histfaku BDU, adznačajuć, što ŭ maładości jon ź simpatyjaj staviŭsia da nacyjanalnaha ruchu i demakratyčnaj apazicyi, adnak paźniej jaho pohlady radykalna źmianilisia.
Ciapier čytajuć
«Čaściej za ŭsio žučok staviać niedaloka ad razietak». Jak siłaviki prasłuchoŭvajuć biełarusaŭ pa telefonie i ŭ kvaterach11
Kamientary