Padčas skryninhu ŭdajecca papiaredzić uźniknieńnie 80% vypadkaŭ raku šyjki matki i kałarektalnaha raku, paviedamiŭ namieśnik dyrektara pa navukovaj pracy RNPC ankałohii i miedycynskaj radyjałohii imia Alaksandrava Siarhiej Krasny na pres-kanfierencyi ŭ Minsku 27 vieraśnia. Pavodle jaho słoŭ, heta adbyvajecca za košt vyjaŭleńnia i svoječasovaha lačeńnia pieradpuchlinnych zachvorvańniaŭ.
Krasny adznačyŭ, što pry skryninhu (abśledavańnie zdarovych ludziej adpaviednaha ŭzrostu) rak pieršaj i druhoj stadyj vyjaŭlajuć u 80% vypadkach, a ŭ krainie ŭ cełym — nie bolš jak u 60% vypadkach. Krasny padkreśliŭ, što na pieršaj stadyi raku «vyžyvalnaść imkniecca da 100%».
Dla prafiłaktyki raku i vyjaŭleńnia puchlin ŭ pačatkovaj stadyi ŭ Biełarusi raspracavanyja prahramy skryninhu małočnaj załozy, prastaty, šyjki matki, toŭstaj kiški i lohkaha. Hetyja łakalizacyi, skazaŭ Krasny, achoplivajuć bolš za 50% vypadkaŭ złajakasnych utvareńniaŭ.
Arhanizacyja skryninhu zojmie niekalki hadoŭ. «Zvyčajna hety praces raźličany na 10—20 hadoŭ, adnak my budziem ruchacca chutčej, bo abapirajemsia nie tolki na svoj vopyt, ale i na najlepšyja suśvietnyja anałahi», — skazaŭ namieśnik dyrektara RNPC.
Jon adznačyŭ, što arhanizacyja skryninhu rakavych zachvorvańniaŭ (kałarektalnaha raku, šyjki matki, małočnaj załozy i prastaty) praduhledžanaja dziaržprahramaj «Zdaroŭje naroda i demahrafičnaja biaśpieka Respubliki Biełaruś» na 2016—2020 hady.
«Piłotnyja prajekty pa skryninhu dali dobryja vyniki, — skazaŭ Krasny. — I ŭ Biełarusi na arhanizacyju skryninhu vydzielenyja značnyja srodki».
Nahadajem, hałoŭny pazaštatny ankołah Ministerstva achovy zdaroŭja Aleh Sukonka paviedamiŭ 15 červienia na IX źjeździe ankołahaŭ i radyjołahaŭ krain SND i Jeŭrazii, što pryblizna 100 młn dołaraŭ buduć vydzielenyja ź biudžetu Biełarusi ŭ najbližejšyja piać hadoŭ na skryninhavyja prahramy pa vyjaŭleńni raku. Sukonka padkreśliŭ, što skryninh źjaŭlajecca najbolš pierśpiektyŭnym šlacham pavyšeńnia efiektyŭnaści ankałahičnaj dapamohi i rańniaj dyjahnostyki raku, tamu tak važna stvarać u krainie skryninhavyja centry, dzie buduć abśledavać ludziej z hrup ryzyki.
Kamientary