Jeŭrapiejski bank rekanstrukcyi i raźvićcia (JEBRR) pryniaŭ novuju čatyrochhadovuju stratehiju dla Biełarusi, u jakoj vyznačany inviestycyjnyja pryjarytety banka ŭ krainie.
Jak paviedamiła pres-słužba JEBRR, u stratehii adznačajecca, što ŭ suviazi ź niadaŭnimi źmienami ŭ rehijanalnym hieapalityčnym stanoviščy Biełaruś stała demanstravać bolšuju adkrytaść na mižnarodnym uzroŭni i bolšuju hatoŭnaść da abmierkavańnia palityčnaj situacyi ŭnutry krainy, u tym liku pytańniaŭ, źviazanych z vykanańniem pravoŭ čałavieka.
U joj taksama havorycca, što hetyja pazityŭnyja źmieny, a taksama reakcyja na ich mižnarodnaj supolnaści «stvaryli novy palityčny kantekst dla dziejnaści JEBRR» u Biełarusi i «adkryli mahčymaści dla bolš aktyŭnaha ŭzajemadziejańnia ź biełaruskimi ŭładami».
U suviazi z hetym JEBRR hatovy padtrymlivać inicyjatyvy ŭrada pa praviadzieńni kankretnych reformaŭ inviestycyjami i techničnaj dapamohaj dla raźvićcia pryvatnaha siektara, sadziejničańnia pryvatyzacyi, a taksama pavyšeńnia ŭstojlivaści hramadskaj infrastruktury na asnovie kamiercyjnych rašeńniaŭ.
U dakumiencie vyznačany stratehičnyja śfiery, u jakich JEBRR maje namier uzajemadziejničać ź Biełaruśsiu. Pa-pieršaje, heta pavyšeńnie kankurentazdolnaści realnaha siektara ekanomiki. JEBRR, u pryvatnaści, budzie staracca vydzialać doŭhaterminovaje daŭhavoje i akcyjaniernaje finansavańnie miascovym i zamiežnym inviestaram, a taksama padtrymlivać kredytavańnie małych i siarednich pradpryjemstvaŭ (MSP) šlacham raźvićcia ŭstojlivaha i kamiercyjna aryjentavanaha bankaŭskaha siektara. Bank praciahnie kansultavać MSP z metaj pavyšeńnia ich kankurentazdolnaści. Jon taksama budzie spryjać pryvatyzacyi dziaržpradpryjemstvaŭ stratehičnymi inviestarami, jakija zmohuć prynieści kapitał i nou-chau dla pavyšeńnia kankurentazdolnaści i pradukcyjnaści.
Jašče adnoj stratehičnaj śfieraj vyznačana pavyšeńnie ŭstojlivaści i jakaści pasłuh u siektary hramadskaj infrastruktury. JEBRR budzie sadziejničać udziełu pryvatnaha siektara ŭ akazańni hramadskich infrastrukturnych pasłuh. Bank taksama budzie staracca padtrymlivać svaimi inviestycyjami i techničnaj dapamohaj vyrazna vyznačanyja inicyjatyvy ŭrada, nakiravanyja na praviadzieńnie reformaŭ u municypalnym, transpartnym i enierhietyčnym siektarach. JEBRR budzie akazvać padtrymku ŭ hetych śfierach u adpaviednaści z pryniataj im kancepcyjaj pierachodu da zialonaj ekanomiki (PZE), tym samym dapamahajučy Biełarusi ŭ pierachodzie da nizkavuhlarodnaj ekanomiki, u jakoj dziaržaŭnyja i pryvatnyja inviestycyi buduć ažyćciaŭlacca ź minimalnym upłyvam na navakolnaje asiarodździe.
Nahadajem, stratehija JEBRR na 2013—2015 hady nie praduhledžvała finansavańnia biełaruskaha dziaržsiektara. Na sustrečy z prezidentam JEBRR Sumam Čakrabarci 18 lutaha 2016 hoda ŭ Minsku Alaksandr Łukašenka paprasiŭ źniać «usiakija abmiežavańni pa supracoŭnictvie ź Biełaruśsiu».
U svaju čarhu Suma Čakrabarci zajaviŭ, što asnoŭnaje pytańnie, jakoje budzie ŭźniata pry abmierkavańni novaj krainavaj stratehii JEBRR dla Biełarusi, heta hatoŭnaść urada da ekanamičnych reformaŭ.
JEBRR — mižnarodnaja finansavaja arhanizacyja sa štab-kvateraj u Łondanie, stvoranaja ŭ 1991 hodzie dla padtrymki transfarmacyi ekanomiki ŭ dziaržavach Centralnaj i Uschodniaj Jeŭropy. Asnoŭnyja akcyjaniery banka — ZŠA, krainy Jeŭrasajuza, Japonija. Biełaruś źjaŭlajecca paŭnapraŭnym členam JEBRR z 1992 hoda.
Z pačatku svajoj dziejnaści ŭ Biełarusi ŭ 1992 hodzie JEBRR inviestavaŭ pryblizna 1,8 młrd jeŭra ŭ ramkach prykładna 70 prajektaŭ u roznych siektarach ekanomiki krainy. Važnuju rolu ŭ dziejnaści JEBRR u Biełarusi tradycyjna adyhryvajuć inicyjatyvy ŭ śfiery enierhaefiektyŭnaści i klimatyčnych źmianieńniaŭ, jakija pavinny atrymać dadatkovy impuls u kantekście PZE.
Ciapier čytajuć
«Ja dumaŭ, mianie nie moža ničoha ździvić». Na fudkorcie ŭ minskim HC zrabili płatnyja stały4
Kamientary