Špakoŭski: Na terytoryi Biełarusi znachodziacca 2350 rasijskich vajckoŭcaŭ, dva vajskovyja abjekty. Pra jakoje addaleńnie ad Rasii možna havaryć?
«Na terytoryi Biełarusi znachodziacca 2350 rasijskich vajckoŭcaŭ i dva vajskovyja abjekty», — nahadaŭ palitołah Alaksandr Špakoŭski ŭ adkaz na mierkavańni, što Biełaruś źmianiła svajo staŭleńnie da Rasii paśla anieksii Kryma i padziej u Danbasie.
Pra heta biełaruski palitołah zajaviŭ na kanfierencyi «Iniercyja, umacavańnie niejtralitetu ci źmiena vonkavapalityčnaj aryjentacyi? Vonkavaja palityka Biełarusi na sučasnym etapie».
Na dumku Špakoŭskaha, Rasija zastajecca nadziejnaj sajuźnicaj Biełarusi i zabiaśpiečvaje našaj krainie nadziejny parason ad scenaroŭ kalarovych revalucyj.
«U surjoznych kołach nichto ŭsurjoz varyjantu vajennaha kanfliktu Rasii i Biełarusi nie razhladaje», — zaznačyŭ jon i nahadaŭ pra pastaŭki vajskovaj techniki Rasijaj Biełarusi.
Ź im nie pahadziŭsia Arsień Sivicki z Centra stratehičnych i zamiežnapalityčnych daśledavańniaŭ. Na dumku Sivickaha, fakt raźmiaščeńnia Rasijaj dyvizij u Klincach i Jelni na samaj miažy ź Biełaruśsiu nadzvyčaj tryvožny. A jašče bolšuju tryvohu vyklikaje toj fakt, što z kiraŭnictvam Biełarusi ŭ hetym pytańni nie railisia. Niepakoj vyklikajuć i scenary, jakija raspracoŭvajucca ŭ rasijskim Hienštabie adnosna Biełarusi, skazaŭ Sivicki.
Što da ŭzbrajeńniaŭ, to Sivicki ličyć važnym toj fakt, što Biełaruś raspracavała «Pałanezy» ŭ supracoŭnictvie z Kitajem. Kitaj taksama moža stać partnioram Biełarusi ŭ raspracoŭcy apieratyŭna-taktyčnych rakiet i zienitna-rakietnych kompleksaŭ, adznačyŭ Sivicki. Jon taksama źviarnuŭ uvahu, što pieršyja «Pałanezy» raźmiaščajuć u artyleryjskaj čaści ŭ Asipovičach (Uschodniaja Biełaruś), a nie ŭ Breście, dzie taksama isnuje anałahičnaja vajskovaja adzinka.
U toj ža čas prafiesar BDU Uładzimir Snapkoŭski adznačyŭ, što vymušany razvarot Biełarusi ad Rasii da Zachadu mahčymy tolki ŭ tym vypadku, kali Rasija prajavić ahresiju ŭ dačynieńni da Biełarusi, zamachniecca na jaje suvierenitet. Dobraachvotny razvarot Minska niemahčymy, miarkuje Snapkoŭski. Snapkoŭski ličyć trochi nadumanym, niedakazanym tezis pra toje, što Biełaruś u apošnija hady addaliłasia ad Rasii.
Kanfierencyja prajšła ŭ «Drazdy-kłubie» ŭ Minsku 29 červienia. Jana była arhanizavanaja Centram Astrahorskaha. Siarod jaje ŭdzielnikaŭ byli jak pradstaŭniki niedziaržaŭnych analityčnych centraŭ i ŚMI, tak i ekśpierty ź dziaržaŭnych struktur.
Kamientary