Aleksijevič na dypłamatyčnaj mašynie pryvieźli ŭ Litvu bieź vizy
Laŭreat Nobeleŭskaj premii ŭ halinie litaratury Śviatłana Aleksijevič pryjechała ŭ Litvu ź Miensku i naviedała Paniaviež (Paniaviežys), dzie aktory Paniavieskaha dramatyčnaha teatru adyhrali spektakl «Čarnobylskaja malitva», pastaŭleny pavodle napisanaj joju adnajmiennaj knihi.
U piatnicu nobeleŭskaja laŭreatka, jakuju čakali u Vilni, nia vyjšła ź ciahnika. Kiraŭnik paniavieskaha dramatyčnaha teatru imia Juozasa Miltinisa, jaki čakaŭ jaje, litaralna asłupianieŭ, bo nia byŭ papiaredžany, što Śviatłana Aleksijevič nie pryjedzie, paviedamlaje Słužba navinaŭ Litoŭskaj televizii.
Jana była zaprošanaja na premjeru spektaklu, pastaŭlenaha pavodle jaje knihi «Čarnobylskaja malitva», i na dyskusiju z hledačami.
Kali vyśvietliłasia, što piśmieńnica nie paśpieła padać dakumenty na vizu, na prośbu ministra zamiežnych spravaŭ Litvy Linasa Linkiavičusa jaje pryvieźli ź Miensku ŭ Paniaviež na mašynie litoŭskaj ambasady ŭ Biełarusi.
Užo ŭ Paniaviežy jana raskazała, što jaje žyćcio źmianiłasia paśla atrymańnia premii — ciapier jana šmat padarožničaje, daje interviju, a času pisać novuju knihu pra kachańnie zastajecca mała.
«Šalony rytm. Nie mahu nivodnaha słova spakojna vymavić, pra niešta prahavoryśsia ŭ samalocie abo siabru skažaš — a zaŭtra ŭžo čytaješ u hazetach», — skazała nobeleŭskaja laŭreatka.
Piśmieńnica skazała, što jana jeździć nie na ŭsie premjery, pastaŭlenyja pavodle jaje tvoraŭ, ale ad zaprašeńnia ŭ Paniaviež nie mahła admovicca.
«U studenckija časy ŭsie havaryli pra Paniaviež, pra teatar, pra aktora Banijonisa, tamu i zhadziłasia. Nazva Paniaviež mieła čaroŭny upłyŭ na majo rašeńnie», — pryznałasia Śviatłana Aleksijevič.
Ciapier čytajuć
U Jeŭrasajuzie 550 tysiač biełarusaŭ z dazvołami na žycharstva4
Kamientary