Uzimku Miensk sapraŭdy spadziavaŭsia "pieraharnuć staronku" z palityčnymi viaźniami dy vyjści na bolej kanstruktyŭnyja stasunki sa Štatami. Ale… Piša ŭ svaim błohu Alaksandar Kłaskoŭski.
Zaŭtra Biełaruś pakidajuć 11 amerykanskich dyplamataŭ. Na pieršy pohlad, zvyšdziaržava skaryłasia pierad maleńkaj, ale hordaj respublikaj. Adnak naŭrad ci heta nasamreč tak.
Farmalna Bieły dom abvierh infarmacyju Asašyejted Pres pra rašeńnie pajści na zakryćcio abiedźviuch ambasadaŭ. Nia dumaju, adnak, što karespandenty AP kiepska myjuć vušy :) Dyj nia kožny dzień Vašynhton faktyčna rvie stasunki ź niejkaj krainaj. Tamu, dumaju, žurnalist trojčy pierapytaŭ by čynoŭnika dziarždepu, pierš čym davać takuju natatku.
Naprošvajecca versija, što mieła miesca naŭmysnaje źlivańnie infarmacyi pra namier ździejśnić taki voś radykalny krok. Inšaja reč, što zakryćcio ambasadaŭ jość planam "B". Vyciečka infarmacyi pra hatovaść jaho ažyćciavić hruntavałasia na psychalahičnym raźliku: aćvierazić! Miarkujučy pa ŭsim, raźlik daŭ pieršapačatkovy plon. Jak vynikaje z tłumačeńniaŭ amerykancaŭ, rašeńnie začynić svaju ambasadu i, adpaviedna, paprasić z Vašynhtonu dy Ńju-Jorku reštu biełaruskich dyplamataŭ było prypynienaje ŭ vyniku niejkich aperatyŭnych kantaktaŭ na dyplamatyčnym uzroŭni.
"Zaraz nia jdzie havorka pra viartańnie da sytuacyi pačatku sakavika, — miarkuje palitolah Valer Karbalevič. — Navat dziela taho, kab zamarozić sytuacyju, bakam patrabujucca niemałyja vysiłki".
U pryvatnaści, ciapier Ameryka patrabuje vyzvaleńnia ŭžo troch palitviaźniaŭ. Pry tym što i adnaje "prablemy Kazulina" było dastatkova, kab u Miensku chto-kolviek zakusiŭ cuhli.
Razam z tym, maneŭry Vašynhtonu śviedčać, što eskalacyja dyplamatyčnaje vajny nie prynosić vialikaj asałody dziejačam ź Biełaha domu. Na zychodzie prezydenctva Bušu było b lepiej prademanstravać niejki prahres u biełaruskim pytańni. Akramia taho, padtrymka demakratyi ŭ Biełarusi dla ZŠA nie pusty huk, i tam razumiejuć, što z zakryćciom ambasady jany tut straciać navat tyja ścipłyja mahčymaści, što mieli dahetul.
Jak ni paradaksalna, ale apošni bolej čym emacyjny kamentar biełaruskaha kiraŭnika nakont Kazulina taksama śviedčyć: uzimku Miensk sapraŭdy spadziavaŭsia "pieraharnuć staronku" z palityčnymi viaźniami dy vyjści na bolej kanstruktyŭnyja stasunki sa Štatami i Zachadam uvohule. Ale kateharyčnaja niazhoda źniavolenaha eks-kandydata na prezydenta źjechać u palityčnuju emihracyju pierakreśliła tyja spadzievy. A dalej pačała ŭžo dziejničać paradyhma "voka za voka": ach, vy tak — nu dyk atrymlivajcie!
I zaraz, akramia ŭsiaho inšaha, my nazirajem kanflikt ambicyjaŭ. Kožny z bakoŭ dumaje pra imidž. Z adnaho boku, zvyšdziaržavie nie pasuje moŭčki vyciracca, raz-poraz atrymlivajučy anučaj pa tvary. Ź inšaha boku, i biełaruskaje načalstva musić trymać marku: nie paddamosia praklatym imperyjalistam! Dziejničaje zakanamiernaść eskalacyi kanfliktahienaŭ. I zusim nia vyklučana, što Ameryka jašče realizuje svoj plan "B".
Ciapier čytajuć
Fienomien miedycynskaha ŭniviersiteta: kabała z raźmierkavańniem, nievialikija zarobki, ale ad abituryjentaŭ adboju niama9
Kamientary