Alaksandr Łukašenka patrabuje źnižeńnia sabiekoštu pradukcyi na 25%. Pra heta jon zajaviŭ 16 lutaha na naradzie ab mierach pa pavyšeńni efiektyŭnaści sacyjalna-ekanamičnaha kompleksu, paviedamlaje pres-słužba prezidenta.
«Važnyja pavyšeńnie jakaści tavaraŭ i pasłuh, źnižeńnie ich sabiekoštu, strymlivańnie inflacyi, zbałansavanaść biudžetu. Słuchajcie, kolki možna pra heta kazać?!» — źviarnuŭsia kiraŭnik dziaržavy da prysutnych.
«U nas što, niama mahčymaści sabiekošt skaracić na 25%? Vy ž pahladzicie: my ŭ 10 razoŭ adstajem ad Zachodniaj Jeŭropy, majučy lepšyja ceny na syravinu i enierhanośbity!» — skazaŭ jon.
«Kankretnaja ličba: źnižeńnie sabiekoštu na 25%, — pastaviŭ zadaču Łukašenka. — I hetuju ličbu panižeńnia nie ŭdasca nikomu narysavać. Ci pojdziecie pad sud, kali pasprabujecie heta zrabić!»
Kiraŭnik dziaržavy zapatrabavaŭ taksama pošuku dadatkovych reziervaŭ ekanamičnaha rostu i ich efiektyŭnaha vykarystańnia. «Ich — mnostva! My idziem i spatykajemsia ab hetyja reziervy! Jak na respublikanskim, halinovym, tak i na rehijanalnym i miascovych uzroŭniach hetyja reziervy treba realizavać!» — zajaviŭ jon.
Pry hetym Łukašenka źviarnuŭ uvahu na toje, što realizacyja na praktycy reziervaŭ ekanamičnaha rostu mahčymaja tolki va ŭmovach inicyjatyŭnaj i efiektyŭnaj pracy kiraŭnikoŭ pradpryjemstvaŭ, pryniaćcia viertykallu ŭłady rašučych i sistemnych mier. «Na žal, ciapier nie ŭsie kirujučyja kadry nakiravanyja na atrymańnie vyniku. Niekatoryja ŭvieś čas čakajuć dziaržpadtrymki — i finansavaj, i arhanizacyjnaj. Nie čakajcie ničoha, zychodzicie z ułasnych mahčymaściaŭ! Budzie mahčymaść — niešta vam dabaviać, heta budzie zvyš taho. Ale nichto nie budzie za vas pracavać!» — padkreśliŭ kiraŭnik dziaržavy.
Kamientary