...Ale našto alharytmy łamać?

Pakul što ŭ siužecie z amerykanskimi sankcyjami i demaršam Miensku bolej pytańniaŭ, čym adkazaŭ.

Niekalki pryncypovych remarak.

Pa-pieršaje, jak zajaviła BiełaPANu pradstaŭnica našaha MZS Vańšyna, "sankcyi nia novyja". A tyja, što byli ŭviedzieny jašče ŭ listapadzie letaś. "Toje, što było apublikavana ŭ listapadzie, było ŭ skarocie, a zaraz heta apublikavana całkam", — patłumačyła spn. Vańšyna.

Karaciej, nie prajšło i čatyroch miesiacaŭ… :)

Kali ž surjozna, to, zhodna z aficyjnaj versijaj biełaruskaha boku, syr-bor razhareŭsia praz tłumačeńnie sutnaści sankcyjaŭ, što źjaviłasia ŭčora na sajcie amerykanskaha Minfinu. Imaviernaja pryčyna: Vašynhton daŭ pašyralnuju traktoŭku listapadaŭskich zachadaŭ, zrabiŭšy ich patencyjna bolej balučymi.

Zrešty, nia vyklučana, što publikacyja na sajcie stała tolki začepkaj, a nasamreč jany ŭžo i tak udaryli našmat macniej, čym jak nam ujaŭlałasia praz bravadu ajčynnaha načalstva. Ci vypadkova dysanansam z hetaj bravadaj jašče pierad Novym hodam z vusnaŭ Alaksandra Łukašenki prahučali pahrozy na adras Karen Stjuart? Faktyčna jany zaraz i realizavalisia.

Čamu mienavita zaraz?

Kali ŭčytacca ŭ zajavy, sfarmulavanyja na ptušynaj movie dyplamataŭ, jość cikavyja momanty.

Analityk Valer Karbalevič u hutarcy sa mnoj zavastryŭ uvahu voś na čym: biełaruski MZS zakinuŭ Štatam parušeńnie niejkaha "ŭzhodnienaha alharytmu dziejańniaŭ što da narmalizacyi stasunkaŭ". Takim čynam, robić vysnovu surazmoŭca, zamiežnaja palityka Łukašenki stanovicca ŭsio bolej zakulisnaj, sychodzić u patajemnyja sfery.

Sapraŭdy, ciapier heta tyčycca nia tolki pasiadziełak z Pucinym u Siličach dy z "Pućmiedzievym" :) u Sočy, ale j dačynieńniaŭ z Zachadam (sakretnyja kantakty ź niamieckim ambasadaram, zahadkavy niaździejśnieny namier pradstaŭnika Biełaha domu Kremera prylacieć u Biełaruś i h.d.).

Całkam imavierna, što zaraz Vašynhton pry dapamozie bolevaha pryjomu daŭ zrazumieć: treba vyzvalać usich palitźniavolenych, uklučna z Kazulinym. I heta vyklikała tut chvaravituju reakcyju.

Tak ci inačaj, Miensk śviadoma idzie na abvastreńnie stasunkaŭ z Amerykaj. Darečy, nia fakt, što hety krok abmiarkovaŭsia ŭčora pa telefonie z Pucinym. Fraza pra toje, što "Alaksandar Łukašenka i Uładzimier Pucin abmierkavali taksama stan i pierśpiektyvy raźvićcia stasunkaŭ Biełarusi z asobnymi zachodnimi dziaržavami", jość, zaŭvažcie, farmuloŭkaj presavaj słužby biełaruskaha kiraŭnika. Nia vyklučana, što heta ajčynny pijaraŭski rajal u kustoch, padrychtavany mienavita da siońniašnich padziej i raźličany na svoj elektarat. Maŭlaŭ, "riebiata, nie Moskva l za nami?".

I tym bolej małaimavierna, što mienavita Maskva padšturchnuła da takoha demaršu. Bo ŭ Kramla z Vašynhtonam kalizija ŭ zusim inšym pytańniach: supraćrakietnaja abarona, Kosava… Biełaruskaje ž kiraŭnictva ŭ dadzienym vypadku vajuje nie za hučnyja lozunhi (kštałtu "My — za šmatpalarny śviet!" dy "Nie — razhortvańniu SRA!" :), a za banalny materyjalny intares, prycisnuty sankcyjami suprać "Biełnaftachimu". Rasieju hety siužet asabliva nia hreje.

Palitolah Andrej Fiodaraŭ miarkuje: vobraz voraha zaraz moža być pilna patrebny Miensku, kab śpisać na zaakijanskija padkopy paharšeńnie ekanamičnaj dy finansavaj sytuacyi, jakaja ŭžo siońnia, mahčyma, značna ciažejšaja, čym malujuć aficyjnyja krynicy.

Dadamo: nia varta dumać, što biełaruskaje kiraŭnictva takim čynam spalvaje masty ŭ dačynieńniach z Zachadam.

Pa-pieršaje, Brusel — u miakkaj pastcy padpisanaha siońnia pahadnieńnia ab adkryćci ŭ nas ofisu Eŭrakamisii.

Pa-druhoje, Eŭropa ŭvohule značna macniej, čym ZŠA, źnitavanaja ź Biełaruśsiu ekanamičnym prahmatyzmam.

Pa-treciaje, i palityčny handal z Amerykaj Miensk peŭna pasprabuje praciahnuć. Siońniašni demarš, mahčyma, raźličany mienavita na padvyšeńnie stavak. Kab viedali pychlivyja janki: niama čaho łamać alharytmy! :)

Ameryka, miž inšym, taksama hulaje, i trochi bolej składana, čym je2-je4. Admietny štrych: ichniaja ambasadarka nie śpiašajecca pakidać haścinnuju biełaruskuju stalicu :)

• 0
• 0
• 0
• 0
• 0
• 0
• 0
• 0