Adłup Kramlu ŭ sacyjalahičnaj abhortcy
Ličba, padadzienaja ŭradavaj ahiencyjaj, u sensie demanstracyi niezaležnickich nastrojaŭ vyhladaje navat bolej "krutoj", čym źviestki NISEPD. Piša ŭ svaim błohu Alaksandar Kłaskoŭski.
Nievialičkaja natatka BIEŁTA praliła na sočynskija pieramovy, badaj, bolej śviatła, čym medyjnyja padrabiaznaści pra toje, jaki napoj — zialonuju harbatu ci kakavu — užyvali Łukašenka ź Miadźviedzievym u Čyrvonaj Palanie :) Havorka idzie pra paviedamleńnie pad zahałoŭkam "Balšynia biełarusaŭ nie prymaje ŭvachodžańnie respubliki ŭ skład Rasiejskaj Federacyi — sacapytańnie".
Najpierš kidajecca ŭ vočy prapahandyscki aksiumaran: z adnaho boku, recha savieckaha administracyjnaha padziełu — reliktavy termin "respublika" ŭ dačynieńni da suverennaj dziaržavy; ź inšaha — niezaležnicki patas u stylistycy apazycyjnaha mitynhu.
Ale hałoŭnaje — sensavy akcent i čas publikacyi.
Pa-pieršaje, daśledavańnie było, chutčej za ŭsio, šmatplanavym, i tut vychaplena akurat taja prablema, što zaraz smylić kiroŭnaj viarchoŭcy ("u kaho što balić…").
Pa-druhoje, apytańnie ładziłasia Infarmacyjna-analityčnym centram pry administracyi Łukašenki jašče ŭ listapadzie — śniežni letaś, to bok dva miesiacy tamu. NISEPD daŭno nadrukavaŭ vyniki svajho śniežańskaha zandažu hramadzskaje dumki. Darečy, pavodle jaho, za stvareńnie adzinaj dziaržavy z Rasiejaj — 13,1%. Na hetym tle ličba, padadzienaja ŭradavaj ahiencyjaj, vyhladaje navat bolej "krutoj" u sensie demanstracyi niezaležnickich nastrojaŭ: tolki 3,4% apytanych vykazalisia za ŭvachodžańnie ŭ skład RF.
Užo byli precedenty, kali aficyjnyja struktury rabili nabytkam šyrokaj publiki padobnyja ličby niezaležnickaha kštałtu. Adbyvałasia heta mienavita ŭ tyja momanty, kali Maskva abvastrała pytańnie pra "much i katlety".
I hetym razam (tut całkam maje racyju palitolah Vital Silicki) u sacyjalahičnaj abhortcy Miensk daje adłup Kramlu. Kali biez zališniaj dyplamatyi, to sens mesydžu taki: nakiniecie abjadnaŭčy referendum — atrymajecie dulu z makam.
Što-što, a referendumy naša vertykal ładzić umieje!
Kamientary