Śledčyja ŭ Hiermanii vyznačyli asoby ŭsich padazravanych u padryvie «Paŭnočnych patokaŭ»

Pa infarmacyi žurnalistaŭ, śledčyja atrymali ordary na aryšt šaści hramadzian Ukrainy: čaćviarych vadałazaŭ, śpiecyjalista pa vybuchoŭcy, kapitana sudna i kiraŭnika hrupy dyviersantaŭ.

Kiraŭnikom hrupy, pa viersii śledčych, byŭ Siarhiej K., jakoha ŭ žniŭni zatrymali ŭ Rymini, kudy jon pryjechaŭ na adpačynak ź siamjoj, raskazali žurnalisty. Zatrymanamu ŭkraincu — 49 hadoŭ, raniej jon byŭ supracoŭnikam SBU, ale ŭ apošni čas zarablaŭ pradprymalnictvam, havorycca ŭ rasśledavańni.

U materyjałach vydańniaŭ zhadvajecca instruktar pa dajvinhu Uładzimir Ž., ordar na aryšt jakoha byŭ vydadzieny jašče ŭ červieni 2024 hoda. U toj momant mužčyna žyŭ u Polščy, ale ŭłady krainy admovilisia vydavać jaho Hiermanii. U vyniku Ž. pakinuŭ terytoryju ES.

U lik padazravanych, pa danych žurnalistaŭ, uvachodzić supracoŭnik toj ža škoły dajvinhu, dzie vykładaŭ Ž., Jaŭhien U. Śledstva miarkuje, što jon spačatku ŭvachodziŭ u dyviersijnuju hrupu, jakaja musiła ździejśnić padryŭ hazapravoda «Turecki patok». Ataku ŭ vyniku nie praviali, a U. dałučyŭsia da hrupy, jakaja rychtavała padryvy «Paŭnočnych patokaŭ».

Pra žonku Jaŭhiena Śviatłanu U., jakuju raniej nazyvali adnoj z padazravanych, u rasśledavańni Die Zeit, ARD i Süddeutsche Zeitung nie havorycca. Pry hetym žurnalisty raspaviadajuć pra 40‑hadovuju dajvieršu Valeryju T., jakaja pracavała ŭ toj ža škole dajvinhu, što i astatnija fihuranty.

Jašče adnym datyčnym da dyviersii nazyvajuć 41‑hadovaha biźniesmiena Rustema A., kampanija jakoha apłaciła jachtu «Andramieda», na jakoj dyviersanty dabralisia da miesca ŭstanoŭki vybuchoŭki. Infarmacyja ab kapitanie sudna niedastupnaja, imia mierkavanaha śpiecyjalista pa vybuchoŭcy nie raskryvajecca. Pry hetym žurnalisty adznačajuć, što ŭ skład ekipaža ŭvachodziŭ škipier Juryj T. z Adesy. Jak śćviardžajecca, jon byŭ daśviedčanym marakom i ŭdzielničyŭ u bujnych rehatach. Uvajšoŭ jon u lik padazravanych ci nie — nie ŭdakładniajecca.

Jašče adzin padazravany, 52‑hadovy Usievałod K., mahčyma, zahinuŭ na vajnie z Rasijaj, havorycca ŭ rasśledavańni. Da adpraŭki na frant ukrainiec prachodziŭ śpiecyjalizavanuju padrychtoŭku dla sałdat ZSU ŭ vučebnym centry Bundesvera ŭ Vildflekenie. Jakuju rolu jon moh zajmać u składzie dyviersijnaj hrupy — nie paviedamlajecca.

Padazravanyja karystalisia pašpartami z falšyvymi imionami, ale pry hetym sami dakumienty byli sapraŭdnyja, adznačajuć žurnalisty. Pa mierkavańni śledčych, heta śviedčyć ab padtrymcy dyviersii z boku vysokapastaŭlenych pradstaŭnikoŭ ukrainskich uładaŭ.

U vieraśni 2022 hoda adbylisia ŭciečki na hazapravodach «Paŭnočny patok 1» i «Paŭnočny patok 2» u vyklučnaj ekanamičnaj zonie Danii. Šviedskija śpiecyjalisty vyznačyli na miescy ŭciečak ślady vybuchoŭki.

Niamieckija śledčyja dapuskajuć, što da vybuchu na «Paŭnočnych patokach» moh być datyčny ŭkrainski vajskoviec. Taksama vajennaja raźviedka Niderłandaŭ za niekalki miesiacaŭ da vybuchaŭ pierachapiła infarmacyju pra padrychtoŭku Ukrainaj dyviersii.

U listapadzie 2023 hoda Der Spiegel i WP pisali, što kaardynataram vybuchu hazapravoda «Paŭnočny patok» byŭ pałkoŭnik, były kamandzir adnaho z padraździaleńniaŭ Sił śpiecyjalnych apieracyj Ukrainy Raman Čarvinski.

• 1
• 1
• 3
• 0
• 0
• 0
• 0
• 0