Syn hałoŭnaha ideołaha Dzianis Zamiatalin atrymaŭ 5,5 hoda kałonii 

Siońnia ŭ sudzie Zavodskaha rajona Minska abvieščany pryhavor pa spravie ab niezakonnaj pradprymalnickaj dziejnaści ŭ składzie złačynnaj hrupoŭki z atrymańniem dachodaŭ u asabliva bujnym pamiery (č. 3 art. 233 KK). Asablivaja ŭvaha da pracesu vyklikanaja tym, što na łavie padsudnych apynuŭsia Dzianis Zamiatalin — syn byłoha hałoŭnaha ideołaha krainy Uładzimira Zamiatalina.

Razam ź Dzianisam Zamiatalinym u stvareńni łžepradprymalnickich struktur, abarot jakich pieravysiŭ 100 młrd. rubloŭ, abvinavačvalisia Juryj Klimovič, Alaksiej Sahan, Anatol Padprataŭ, Alaksandr Ivanoŭ, Ivan Makaranka i Alaksandr Biaskłubny.

Pavodle źviestak śledstva, Dzianis Zamiatalin byŭ adnym z arhanizataraŭ złačynnaj hrupoŭki, jakaja z 2008 pa 2010 hod nibyta zajmałasia niezakonnymi finansavymi apieracyjami, u tym liku pradstaŭlała falšyvyja spravazdačy ab upłacie padatkaŭ. Jamu i inšym abvinavačvanym byli vystaŭleny hrašovyja iski na ahulnuju sumu ŭ 81,3 młrd. u jakaści spahnańnia dachodaŭ, atrymanych złačynnym šlacham. 

Usie siamiora vinavatymi siabie nie pryznajuć i miarkujuć, što dokazy sfalsifikavanyja śledstvam, jak nie pryznali i vyłučanych iskaŭ. 

Sud pryhavaryŭ Zamiatalina da pazbaŭleńnia voli terminam na piać z pałovaj hadoŭ u kałonii ŭzmocnienaha režymu z kanfiskacyjaj majomaści i zabaronaj zajmacca pradprymalnickaj dziejnaściu na praciahu piaci hadoŭ. 

Takoje ž pakarańnie vyniesiena Klimoviču. 

Sahan i Padprataŭ pryhavoranyja da pazbaŭleńnia voli terminam na try z pałovaj hady ŭ kałonii ŭzmocnienaha režymu z kanfiskacyjaj majomaści i zabaronaj zajmacca pradprymalnickaj dziejnaściu na praciahu piaci hadoŭ. 

Ivanoŭ i Makaranka pryhavoranyja da dvuch hadoŭ pazbaŭleńnia voli ŭ kałonii ŭzmocnienaha režymu z kanfiskacyjaj majomaści i zabaronaj zajmacca pradprymalnickaj dziejnaściu na praciahu piaci hadoŭ. 

Biaskłubny atrymaŭ pakarańnie ŭ vyhladzie troch z pałovaj hadoŭ pazbaŭleńnia voli ŭ kałonii strohaha režymu z kanfiskacyjaj majomaści i zabaronaj zajmacca pradprymalnickaj dziejnaściu na praciahu piaci hadoŭ. 

Pavodle pastanovy suda ŭsim abvinavačvanym była źmieniena miera strymańnia z padpiski ab niavyjeździe na ŭziaćcie pad vartu ŭ zale suda. Pakolki Sahan i Klimovič na vyniasieńnie pryhavoru nie źjavilisia, jany buduć abjaŭlenyja ŭ vyšuk. 

Varta zaznačyć, što Zamiatalin i raniej znachodziŭsia pad vartaj, bo prachodzić abvinavačvanym pa jašče adnoj spravie, jakaja słuchajecca ŭ hetym ža sudzie, — ab atrymańni chabaru. 

U dačynieńni da Ivanova sud pastanaviŭ prymianić prymusovyja miery lačeńnia ad ałkahalizmu ŭ miescy adbyvańnia pakarańnia. 

Sud taksama zadavoliŭ hramadzianski isk da abvinavačvanych na sumu 81,3 młrd. rubloŭ. 

Dziaržabvinavaŭca, maci i žonka Dzianisa Zamiatalina, jakaja taksama źjaŭlajecca jaho advakatam, ad kamientaryjaŭ admovilisia. 

Varta zaznačyć, što hety sudovy praces — druhi pa hetaj spravie ab niezakonnaj pradprymalnickaj dziejnaści. Pieršy byŭ u 2010 hodzie. Tady Dzianis Zamiatalin pravioŭ pad vartaj dva miesiacy i da suda byŭ vyzvaleny pad padpisku ab niavyjeździe. U 2012 hodzie jaho i inšych fihurantaŭ rajonny sud apraŭdaŭ, ale prakuratura abskardziła heta rašeńnie. Minharsud paćvierdziŭ vierdykt suda pieršaj instancyi, a Viarchoŭny sud jaho admianiŭ i adpraviŭ spravu na novy razhlad. U lipieni 2013 hoda Zamiatalina znoŭ uziali pad vartu. 

Jaho baćka Uładzimir Zamiatalin pryjšoŭ u vialikuju palityku ŭ 90-ja hady z pres-słužby Ministerstva abarony. Jon uvachodziŭ u kamandu premjer-ministra Biełarusi Viačasłava Kiebiča na pieršych prezidenckich vybarach 1994 hoda. U pasłužnym śpisie Zamiatalina byli pasady staršyni Dziaržkamiteta pa druku, vice-premjera, jaki adkazvaŭ za pytańni kultury, adukacyi, relihii i nacyjanalnych mienšaściaŭ, namieśnika kiraŭnika Administracyi prezidenta pa pytańniach ideałohii. Paśla hetaha Uładzimir Zamiatalin pracavaŭ u bankaŭskaj śfiery, a ŭ 2006—2010 hadach byŭ hiendyrektaram «Biełaruśfilma».

• 0
• 0
• 0
• 0
• 0
• 0
• 0
• 0