Doktara histaryčnych navuk Śviatłanu Kul-Sialvierstavu zvalniajuć z Hrodzienskaha ŭniviersiteta
Praciahvajecca palityčna matyvavany pahrom akademičnych kołaŭ Hrodna.
Doktaru histaryčnych navuk Śviatłanie Kul-Sialvierstavaj nie praciahnuli kantrakt z-za «małoj publikatarskaj dziejnaści». Što praŭda, za apošnija piać hod vychodzić čaćviortaja jejnaja kniha.
Papiaredni kantrakt spadaryni Kul-Sialvierstavaj skančajecca 29 śniežnia. Jak aficyjnuju pryčynu jaje zvalnieńnia nazyvajuć niapoŭnuju adpaviednaść pasadzie, padstavaj dla jakoj stała małaja publikatarskaja dziejnaść. U minułym hodzie historyk pracavała na paŭtary staŭki.
U hetym śviadoma pajšła na 0,25, bo viedała, što jaje zvolniać.
«Kažuć, nie adpaviadaju. Heta raduje. Ciapier adpaviadać univiersiteta ŭ Hrodnie — heta soram. Tam byŭ taki durdom i hułah, što narmalnamu čałavieku nie vytrymać. Vykładčyki byli jak raby ŭ administracyi, dzikaja biurakratyja i niepavaha da navuki. Heta adbyvałasia mienavita apošnija dva hady, jak pajšoŭ Jarmusik z dekanstva, stała zusim nievynosna. Za pracu ŭ hetym univiersitecie nie trymałasia – heta ŭžo nie moj univiersitet.
Toje, što stvarałasia 35 hadoŭ, źniščyli za try hady», — Śviatłana Kul-Sialvierstava kaža pra svajo zvalnieńnie z palohkaju.
Jana čytała kurs biełaruskaha skorapisu i biełaruskaj histaryčnaj chranałohii. U apošnija miesiacy kansultavała kalehu, kab pieradać jamu svaje viedy. Miarkuje, što pieradała.
Spadarynia Śviatłana ŭžo šeść hod pracuje ŭ Biełastoku na fakultecie kiravańnia Politechničnaj Akademii.
Jana pa-polsku vykładaje historyju architektury i mastactva, historyju kultury, dva nievialikich kursy, źviazanyja z ekanomikaj turyzmu, kiruje mahistrantami, viadzie mahistarski sieminar. Zapeŭnivaje, što zarobku joj chapaje na žyćcio. Havoryć, hałoŭnaje, kab chapiła na knihi paezii, jakija jana drukuje za svaje srodki.
«Ciapier narešcie svaboda! Ja ciapier znoŭ pačnu pisać vieršy. Jany zaŭsiody sa mnoj. Uviesnu vyjdzie novaja kniha paezii», – nie kryje spadziavańniaŭ historyk.
Niadaŭna vykładčyca addała ŭ druk manahrafiju «Biełaruski čas. Letaźličeńnie ŭ Biełarusi sa staražytnaści da sučasnaści». Heta pieršaja kniha pa histaryčnaj chranałohii ŭ biełaruskaj historyjahraficy. Navukoviec cikavicca temaj času.
Nastupnaja kniha, nad jakoj jana pracuje razam z kaleham Andrejem Kištymavym, datyčycca hadzińnikaŭ dy hadzinaŭ.
Sioleta spadarynia Śviatłana dasiahnuła piensijnaha ŭzrostu, ale spadziajecca dapracavać u Biełastockaj Akademii da «polskaj piensii». U pierśpiektyvie płanuje zaniacca vyvučeńniem histaryčnaj mietrałohii.
U chvalu zvalnieńniaŭ raniej trapili mnohija inšyja vykładčyki Hrodzienskaha ŭniviersiteta, siarod jakich Ina Sorkina, Viačasłaŭ Švied, Andrej Čarniakievič, Ihar Kuźminič, Volha Sabaleŭskaja.
Ciapier čytajuć
Jaŭhien Afnahiel raskazaŭ, što było paśla suda, dzie skandavali «Vierym, možam, pieramožam!» I nazvaŭ, chto dla jaho sapraŭdny lidar Biełarusi10
Kamientary